World Cup Zunzam : O Maradona!

Kei, Argentina \antu, naupan laia Exercise bu kawma Diego Armando Maradona thlalak (World Cup a fawhna) chuanna hmang ve tawh hian football lamah hnuhma nei lian ve lem lo mah ila, khawvela football inelna sang ber, the greatest show on earth an tih hial FIFA World Cup Football chungchang sawi ka han tum ve chu a nia! Football khel tura thlan awm tawh reng renga vawi khat mah first eleven-a la koh ve ngai loh hian eng khaw kha sawi tur pawh ka hre lo reng a...Coaching lamah erawh chhuan tur ka nei : Branch YMA Tournament siama \um khat Champion Coach ka niha Cup ka chawi lai thlalak dah \hat tur ka nei ve tlat.

A ni tak a, kan hunlai (han ti ve khang lang ila), kan naupan laia Goal veng \hin ngat kha chu ven thiam vang ni lo, dawihzep vang leh inkhelh thiam loh vang a ni chawk a; Goal ka veng \hin! 

Kha exercise book a\ang khan a ni World Cup hi ka lo hmelhriat ve chauh ni! An khel lai phei chu mit phei chuan ka la hmu lo lehnghal. Kan khuaah khan Television chu sawi loh Tape recorder pawh Retailer leh Primary zirtirtu pakhat bakin an la nei lo. Keini saphing, pawnchhe tel khawm leh ser\awk vuak dup pet mai mai tan chuan kar a la hla deuh a ni. Football pawh Savun \ha pangngaia siam Primary sikul ta kha kan hmuh phak chu a ni mai a!  Ke-lawngin kan pet a, ke a thip duh em em lehnghal! Chutah  goal venga \ang chi chuan pet chance kan nei lo em em mai lehnghal.

Tin, ngaiteh, 1990 a lo inher chhuak a, Khawruhlian lamah lehkha zirin ka awm. World Cup kum a lo ni a, a takin T.V.-ah chuan  an inkhel lai chu kan awmna a\anga kilometres 3 vela hlaah kan pan \au’h \au’h \hin a. Khawruhlianah khan Colour T.V. pahnih chiah  awm tain ka hriaa, \um khat chu half time hi ka en ve! Black and White-ah kan en a, fiah chang nei kha a nia, muri  lah a tam. En tui laklawh laiin tlangval \henkhat luhai tawhten Antenna an lo her thul! ‘Aw ti khan a fiah...a fiah leh lo...a ngai ang khan...her leh hret...aw..tikhan a fiah’ ti reng reng khan hun kan hmang a; keini naupang kha chuan chhuata khupa kutsuihin kan en a ni. A fiah loh zual chang leh jersey hriat hran har deuh an awm \um chuan kan \an loh lam chet \hatah pawh kan lo au ve \hawt \hawt \hin kha a ni a. Kan lo ralkhat ngaihnep ngawt na a, Bangladesh TV lo awm kher kher kha chu \ha ngawt mai. Bangladesh pawh kan ti lo va, bangla kan ti kher a nih kha! Kha mi \um khan rilru-ah Kareka tih kha a lo lian deuh a niang chu: Rasgulla lei turin miin min tir a, dawr ka thlen khan a hming kha ka theihnghilh ta tlat mai a, Kareka ka ti ngawt pek a, dawrnghaktunu hmai per hlei hluai, samkir chuat, \hu hnur mai kha a nuih a za khawp mai!

1994 a lo inher chhuak leh a, Mizoram khawpui berah ka awm ta. Star TV a lo chhuak tawh bawk a, T.V. a tam tawh bawk a, zia tak chu a ni tawh. Khami \um, USA-in tui let hnua an vawi khat thlen \uma Maradona drug ti an man chhuah \um, TV-a a \ap pur mai thla an tichhuak hmuh hrehawm ka tihzia kha! Khatia ka \an ber mai Maradona, khel thei tawh lo tur kha ka World Cup a tawp a ni ringawt. O Maradona, a va pawi em! Drugs hi a lo va \ha lo em!

1998 erawh kan pianna lamah ka han en ve leh thung a. Colour T.V. 2 chiah a la awm a, Varandah-ah hun chhuah a ni a, khawlai, thosi karah kan \hu khawm ve nghuk mai mawle.

2002 leh 2006 sawi kan ila, 2010-ah zuang dawr’h ang. Ka \an ber mai Maradona enkawl ngeiin Argentina an rawn chhuak leh ta rek rek mai le. Chutah ka Team \an ber Liverpool Player Mascherano captain a la ni zui..ka va \an tehlul, ka sawi chhuak thiam lo zawk! Argentina \antute chu tuai, MHIP pawh lo ti se....a \ul leh Argentina vang chuan ka tuai ve mai ta lawng.

 1.7.2010