A VARA TUAM
April 2005 thla chawhma lam a ni a, Bial K.|.P Chanchin bu buaipuia Computer hmaa ka \hut mêk laiin, Thingtláng lama kan chhûngten min rawn bia a, “ I nau a chau hle a, zanin pawh kan daih tawhin kan inring lo,” an rawn ti thut mai a!
Chu thu avàng chuan thâwklehkhatah ka bîng ta nghal mup mai a. Engtin nge ni ta ang le?A rang thei ang bera kal nghal chu a ni ringawt mai. A ni tak a, khaw hmawr a\anga khaw tâwp, khaw mawng a\anga khaw lû, in tin beng sika han ngaihtuahin, damdawi lam thiam an awm ka hre si lo. A thiam ber pawh naupiang pangngai chhar thei \awn tawn, tih nawn leh huphurh awm khawpa thisen la thei hrãm hrâm, kut dam lêm lo tak chu damdawi lam thiam awmchhun chu a ni. Chumi ngawt chuan inthlamuan harsa tak a ni.
Chuan, kan han kal ta a, kal kawng a thui duh ngei mai. Inbiakpawhna dang a awm tawh si lo va, ‘Min lo la nghâk hrãm ang chu maw, a ruang tal chu kan la nang hman êm ang chu’ ti chungin kan kal zêl a, khaw chhûng luh dáwnah, khuang ri awm leh awm loh thlengin ngaihtuah loh theih pawh a ni lo.
Kan khua chu kan han thleng a, a hnuk êm zawng a lo la chat lo va. Kan thlen ve tâk avànga dam beiseina chu a san phah chuang lo, a chhan chu damdawi han chawh a, han pe tùr chuang kan awm lo. Aizawl a\anga rin thua damdawi han ken ringawt lah chu tih chi a ni bawk si lo. Kan ken ngam chhun pawh nachhâwkna, Paracetamol aia sâng ve deuh a ni.
Chu zan chu damna tùr damdawi thar lam inpêk tùr awm chuang lovin, a nat zual chânga pangti sa lai indeh chu kan thiam tâwk a ni a. Diar nei apiangin tuiah kan chiah a, a pangti sa han deh lah khán a sa rang si a, diar thing vawt kan a awm a, thâwm nei ring ngam si lovin kan phar huai huai hi a ni ber a. Chutiang chuan chu zan chu kan hmang ral a.
Chutiang ngawta a hnukchah nghâka awm reng ringawt chuan a fel dáwn lova hriain chhûngkhat laina inhmu khâwmin bei nge sei rûn dung tiin hmunpui lam pan zai kan rél ta a. A chênpuite ngei pawhin amahah chuan dam beiseina kan nei tawh lo va, khawii lai hmun nge kan thlen hman ang tih chu kan ngaihtuahna a ni. Khawtláng mipuite pawhin kan kal tùr chu ruang chhuak tùr thlah takin min thlah a, an demawm miah lo. A dinhmun enin lirtheia phurh chêt ngamah pawh an ruat tawh lo a ni.
Hlau leh khur chungin kan kal ta. Khaw pakhat kan thlen chuan a nat zual tâk vàng ni lo vin, kan ban leh tùr khua a hlat tawh avàng leh chiu thei pakhatmah kan awm loh avàngin nachhaâwkna chak deuh hleka chiu kan rawt ta a. A rawt chiah kan thei a, a tihpuitlin erawhchu kan ti thei miah lo va, a thiam pawh kan thiam ve hek lo.
Chuan, zan khaw vâwt tak kárah, mi mut reh tawh lamah Nurse pakhat tlawmngai tùrin kan ngên ta chawt mai a. Ani mahni inchhûng luma tui taka lo awm kha, kan mamawhnate kan han sawi chuan phunnawi leh sawisel, hmél hlim lo pu hauh lovin a rawn che chhuak ve ta nghal a. Chu ngawt pawh chu keini thlaphânga awmte tán chuan damna a tling sawng sawng a ni. Min han chiu-sak a, thlavéng (SOS)-ah a eia ei tùr chi min pài zui bawk a, thlamuang takin, buaina leh harsatna lian tham tâwk lovin Aizawl Civil Hospital chu zîng lam dár 2:15 a.m.-ah kan thleng thei ta a.
Lehkha ziah fel ngai hrang hrangte kan ti zung zung a, Nurse duty-te pawhin a hmuam tùr chi te, a zeh tùr chi te, a en tùr awm ang angte an tih theih tâwk an lo ti zung zung bawk a. Nurse-ten an tih theih tâwk chin an tih hnuah Doctor duty erawh chu a \uan a fum deuh a, rilru a hmanhmawh duh khawp mai. Damlo tán leh a chhûngte tán chuan minit khat hi a rei duh viau a ni.
Tihfel ngai \henkhatte tihfel a nih hnuah Damdawi Inah chuan min awmtîr ta a. A hma zana tuisik leh diar hmang ringawta tihnghaihna dang hre chuang si lova inenkawl kha a Vara tuam leh a sen leh pawla hrenin min vil zankhua a, kan chêt ve ngai hauh lo vin, keini aimaha duatin min enkawl chhâwk ta a. A thlamuanthlâk ngei mai. Anni tih a nih chuan keiniina kan tih theih ve reng pawh kha a \ha bîk hian kan hre vek tawh a.
Keimahni lam kan han inen \hìn a, thingtláng khaw chengker tak a\angin neih thinglung kháwngin damna rûn chu kan pan a ni ve si a. Amah pawh hreu sa a nih tawh nak alaiin, kan samte lah chu thlawh loh bapui ang maiin a hreu reru mai si a, kan thawmhnaw hâkte lah chu meikhu rim a nam vung vung mai bawk si a. Tukkhum ût bur mai, kut thap hreih hrawih hawi mãwl tawp mai kha kan ni a. Kan nula hruai ve chhunte lah kha ke sîr eng puap mai hi a ni a, mi \henkhat ang chu ni hlawm se chuan hmél a\anga en chuan hmuhsit a, ngaihsak phû kan ni mawlh lo. Chutiang zawng zawng engmah hre lo awm ang tak chuan mi lian berte enkawl leh ngaihsak ang thovin min buaipui a, lâwmawm duh tak a ni. Natna hian mi lian leh mi hnuaihnung zâwkte a thliar hrang si lo va.
Kan tih tùr kan chunga tla, hmel hlim lo leh sawisel neuh neuh chung leh \awngkam hawihhâwm hmang lova bàk hlar hmang chunga thawh chu a lo hmutute leh tuartute tán a hahthlâk a, kan chezia leh \awngkam hian mi tam tak damna a thlen thei a, mi a ti na zual sawt thei a ni tih hriat reng fo hi a pawimawh rêng a ni.
Doctor chuan sikserh natna a nih a ring nghal a; mahse eng natna dang nge a kaihhnawih tih chu hriat hmaa damdawi han pêk nghal chu an ti si lo. Damdawi lamah chuan hmasâwnna awm chuang lovin chu zan chu kan hmang ral a. Khua alo vâr a, a natna zawng chhuak tùrin thisen min ekzamtîr a. A man tláwmah min kaltîr a, sikserh natna hrik an hmu ta lo! Rizal ang ang chu daktawr ka han hmuh a, a \hutnaah a \hu rem leh tê tê a, min ko a, “Hei Sikserh natna hrik chu an hmu lo chu a ni phawt a, eng pawh nise, sikserh natna hrik awm lo angin ka han enkawl phawt ang a, a man to-a han entîr leh chu a harsa tawh âwm si,” a ti ta ringawt mai a!
Chutia doctor berin a han ti ngawt mai chu ka ngai thiam mawlh lo. Kan neih vàng lam ni lo vin, eng khaw sawi set set lova kan hmél a\anga thisen entîrna tùr pawh nei lova min ngai ngawt kha hriat thiam harsa ka ti hle a ni. Chîng zawm tawh mawlh suh se.
Thisen chu kan han entîr leh a, sikserh hrik chu a lo awm na meuh mai! Doctor rawt ang khán enkawl ni vaih se chuan khami ni kha kan niléngin ka ring lo.
Zan khat chu Nurse duty pakhat hi a \hu tûm hmur reng mai si a, biak kan huphurh tláng hlawm khawp mai a, a \awngkam chhuakte lah chuan ngaihno a bei hlawl si lo. Damlo awmpuitute kha kan awm dàn apiang mai kha min sawisel reng bawk nên. A \hutnaah \hu reng mai se kan ti hlawm hle mai a, a chezia leh hmél han hmuh khán dam \ha pangngai tán pawh nat lûkna tham a ni. Thisen chaw khai a ral dáwn a, kan han hrilh pawhin a rawn kal mai si lo va, tûm buau chungin a rawn kal a, thisen tlêma zawng a lo hîp lêt hman a, min rawn lawi lei liah leh hrep mai bawk si a. Zan a rei duhin, buaipui hrep ngaiin kan awm ang tih pawh hlauhawm tak a ni. Chu nu chuan a mawhphurhna a hre mawlh lo va, a inbihlêt a pawimawh ka ti hle mai. Kan awm chhûngin ka hmu leh ta lo va, vânnei ka inti hle.
Zan khat ve thung chu min enkawltute an rawn inthlâk a, a hma zana mi bawk kha a ni leh ang tih kan hlau hle mai a; mahse a ni lo hlauh. Chu nu chu mi dang a ni satliah lo va, mi thar diai a ni ta. A hlim sâng a, a nêlawm hliah hliah a, amah lah chuan keimahni \anpui tùra awm a nih thu te, a \ûl apianga inthlahrung hauh lova koh phar dawr dawr a inhuam thute a sawi zawh hnuah Pathian hnênah amah leh a enkawlte chu hlânin a \awng\ai a. Engtin mah min \anpui tawh miah lo mahse, chu ngawt pawh chu keini tán chuan damna tling a ni. Mi thar a rawn duty chinah chuan tumah boral pawh an awm lo, mak ve tak a ni!
I duh tâwk rih phawt teh ang.
No comments:
Post a Comment