Kan pik-pak teh ang

 Kan pik-pak teh ang

-Ellis H.Pachuau

Hmânah kha chuan lehkhathawn hi kan ziak vak vak \hìn a, \hian a ni emaw, chhungte lehkhathawn a ni emaw, a...zêp nâk emaw hmangaihte lehkhathawn pawh a ni e, chumi piah lamah Sikul kan kal lai chuan chawlh dilna pawh a ni bawk. Thawn chhuak hnem nà nâ na chuan a dawn pawh kan dawng hnem narawh e.

Kan lehkhathawn dawnte chu inhlut hleih tak pawh an ni hlawm! A \hente chuan thingrem mawng an chang a, chhûngten an hâi thulh pawha an hmuh mai theih loh tùrin kan han thukru a! A \hente chu dah\hat chu sawi loh, kan nuai hlawm nawk nawk a, kawmchárah kan vawm chhuak nawl nawl mai \hìn kha a ni a. 

Lehkhapuan pawh a inang lo nuaih a, a \hen chu rûlrin hmanga ziahte a ni a, a \hen chu naupang exercise book pawh thlâk tih hriat reng rengte kha kan han dawng \hìn kha a nia. A lehkhapuan \hat leh \hat loh lam kan ngaihtuah lo va, a thu lam kha a ni zâwk kan ngaihtuah chu.

Hmangaih lehkhathawn kan han ziak dáwn a, naupang exercise book kan han pawt thla hlawk a, chhûngte hmuh hlau chungchungin kan ziak ru a, bul kan han \an a, hawrawp lian phên phãwnin ‘To’ kan han ti tê tê a, a awmzia pawh kan hriat mang loh Queen of My Heart, Darling tih te, My dear tih duh tâwk mai lovin Love tih te belh hrãmin bul kan han \an ve châwr mai a. Khâ’ngte kha a ziaktu leh a dawngtu pawhin a awmze ril tak chu kan hre phâk chuang hlei lo va! Mahse hlû leh ril riau chuan kan ngai a ni \hìn phawt a.

A chhûng thu-ah kan han lût-a(h) khaw khat / tual khata léngza reng kha ‘Chung khuanu zarah....i dam lai a nih ka beisei...i tel lo chuan hringnun hi....kan han ti kûr nguai mai a. A thlum thei ang ber tùr kha kan han ngaihtuah a, kan hun tawn azir zêla hla lungkuai thei ang ber kha kan han telh ngei mai bawk a!

A kharna kan han siam a :  i tán chauh kumtluangin, i tána rinawm, i tán chauh, nang hmangaih êm êmtu, nangmah vei êm êmtu che....kan ti \hìn. Chutiang lo pawhin Yours forever, with love etc kan ti \hìn.

Chuan, kan ziah zawh hnu-ah  lehkhapuan seizáwngin hmun thum vêlah kan han thlep a, kan thlep lêt leh a, kan bilh lût thlap a, chawmalin kan han char thlap mai \hìn a. Char uar deuh \um phei chuan chawmal lo ro kha a khing uai(h) mai \hìn.

Chuan, kan han inhlân tùrte pawh kha: puar-ak kan han tîr ve vang vang a, kan pêk tùrte chauh pawh kha awm se, a langsar lo thei ang berin, kutin kan han hum \ãt \ãt a, chibai paha kan pêk loh leh, hnung zawngin kan han pe kual vêl \hìn kha a nia; nuam danglam ve \hìn deuh asin.

Chutah, Hmangaih lehkhathawn kan han dawng ale(h), in chhûngah chhiar ngam nghal hek lo, ek in lam kan pan nghal nal nal \hìn. Ek hun bi pangngai piah lamah chuan lehkhathawn kan dawn zin deuh leh kan ek a chhuak zing kha a ni mai a(h)!

Chhûngte hmuh hlau rêng rênga kan han thup kual vêlte kha a lo ngaihawm ta. Tunah zawng kan thawn chhuak ngai lo chu thu hran, kan lehkha dawn ve pawh Committee Kohna tih vêl a ni tawh mai a nih hi a. Huiham, beisei bo deuh asin. Chumi piah lamah “Mobile hmangin kan hmet zet zet a, kan sawi ngam loh \ha \ha kan sawi ngam a, nula no tak tak pawh kan kheuh chhuak zung zung mai \hìn,” tiin tlangval \henkhat chuan an la sawi ta deuh deuh a!

Tuna ka lehkha hmuh ve thung chu BENGVARNA Chanchin Bu Editor-in thuziak tùra min sâwmna lehkha a ni a; heti hian a kheuh hawn nán ka han chháng ta rih a nih hi.