Sermon - RINGTU NUN |HANLENNA

Chhiar tùr :

Lk. 1:38 : Tin, Marin, “Ngai teh, Lalpa bawinu ka ni, i thu ang zelin ka chungah thleng rawh se,” a ti a.

Mat. 5:16 : Chutiang bawkin in eng chu mi mit hmuhin eng rawh se, chutichuan in thil tih \hatte an hmu ang a, in Pa vana mi an chawimawi thei ang.

Joh. 12:28 : Ka Pa, i hming chawimawi rawh,” a ti a. Chutichuan van a\angin aw a lo chhuak a, “Ka chawimawi tawh, ka chawimawi leh bawk ang,” a ti a.

1 Kor. 10:1-6 : Unaute u, heng hi in hriat loh ka duh lo ve, khatia min thlahtute zawng zawng chhum hnuaia an awm vek a, an zaa tuifinriat pawh an kai vek a, an zaa chhumah leh tuifinriatah pawh Mosia bel tùra baptisa an awm vek a, an zaa thlarau lam chaw hmunkhat pawh an ei theuh va, an zaa thlarau lam in tùr hmunkhat pawh an in theuh kha; anmahni zuitu thlarau lam lungpuia mi kha an in theuh si a; chu lungpui chu Krista a ni. Nimahsela, an zinga mi tam zâwk chungah chuan Pathian a lungni ta lo va; thlalerah khán tluhlumin an awm a. Tin, chung chu kan tán entîrna a ni, thil sual an chak ang bawk khán kan chak ve loh nan.

1 Kor. 10:13 : Mihring tuar theih ang chauh lo chu thlemna reng reng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlemna in tawh a phal lo vang; in tuar theihna tùrin thlemna rualin tlan chhuahna kawng a siam nghal zâwk ang.

              Ringtu nun \hang lian zêl tùr hian kawng hrang hrang pawimawh tak tak a awm a, sawi vek sen pawh a ni hek lo vang a, zanina sawi ka’n tum chu kawng chi thum a ni a:

1. I THU NISE TI THEI NUN NEIH A PAWIMAWH :

Lal Isua neitu / mi piangthar/ ringtuten kraws kawng kan zawhna-ah hian keimahni thu te, kan duh dan te, kan tum dante hi kan dah lian fo \hìn. Nimahsela, Pathian hnathawhpuitu, Amah zuitu tán chuan ‘Lalpa i thu nise’ kan tih ngam chin zelah Amah chu kan hnenah inlarin, kan hnenah a awm dáwn a ni.

Mari a\angin ‘I thu ni se’ tih hi lo zir ho dáwn ila:

Kan thu chhiar takah khán Marin, “Ngai teh, Lalpa bawinu ka ni, i thu ang zêlin ka chungah thleng rawh se,” a tih thu kan hmu a. ‘I thu ang zêlin’ tih hi mahni inphatsan a, Pathian thu ang zêla a nun awm a phalna a ni mai a, a pasal hual (Josefa) pawh kha tunah chuan hnawlin a awm ta e, tin, Lal Isua ka hriatpui tùr, ka lo mualpho pui ve tùra hi thihna a ni emaw, tuarna a ni emaw, zahna a ni emaw, mualphona a ni emaw, vânduaina a ni emaw, a nih nih ka lo nihpui ve ang e tihna a ni a. Nang nên kan inkârah hian midang an awm ta lo ve,tihna a ni.

Pathianin Mari a zuk koh lai hian buaipui a lo nei tawh a, pasal hual Josefa a lo nei ve tlat tawh mai a, chu chu tihsawn a ngai dáwn a ni. Lal Isua meuh paitu tùr thinlung pawh a ruak lo a nih chuan Pathian fa ni tùr chuan keiniho thinlung hi chu thenfai nasat a ngai khawp ang.

Vântirhkohin a zuk biak hian Mari hian a ngaihna a hre lo hlemai a, chibai a zuk bûk a, “Chibai, Vohbîk! Lalpa i hnênah a awm,” a ti ringawt mai a: Mari te lah chu mirethei, daikil kâra mi an ni a, chhûngkaw ropui a mi an ni lem lo a ni. Vântirhkoh meuhvin khatianga a’n hrilh kha chu Mari tán chuan a luhaithlâk ve khawp ang. A ngaihna hre lo khân, “Chû’ng chu engtin nge ni ang? Mipa ka nei si lo,” tiin vântirhkoh hnênah hian a zâwt ta phawng mai a ni. Chutah hliah khuhna lo awm dàn tùr zawng zawng kha a han sawi ta a, Mari tán harsatna hlãwm lianpui pakhat,Josefa, pasal hual a lo neih tawh kha a ni a.

William Barclay-a ten an chhui dan chuan, Juda-te an inhual dànah hian stage thum lai a awm a, a stage thumna-ah an awm tawh chuan innei ang tluka ngaih, la inkutsuih lo chauh ang kha an nih avàngin Lehkha tar tawh ang a ni a, Chuvàngin, kha hmeichhia kha emaw a lo uire a, a mipa khan emaw châng dang a lo kân chuan Mosia dàn hman theih a ni tawh a ni. Lunga den hlum theih a ni tihte ziak a ni a. Chutih lai tak chuan Mari hian inlêng hi a nei a ni a. Josefa han hnawl kha chu thu hran lo ni ta sela, a hnawl avànga a nuna buaina lo awm theia kha a tam em em a ni.

Mari dinhmun hi a harsa a ni, Krista lo paitu nihna chu nge a thlan dáwn a, Josefa’n engtin nge a rawn tih ang tih hriat lâwk loh lai a nih avàng khân, kha lama kha hlauthãwngin a awm dáwn em tihte ngaihtuah a ngai a. Tin, anmahni hnam (Juda) dànah chuan, a pa pawh tu nge a nih hriat loh lo pai kha chu thil vânduaithlâk tak a ni a, hnam, chhûngkaw hmingchhiatna a ni a. Chû'ng harsatna lianpui pui mai chu a lehlamah khân a inhûng a, Tichuan Mari’n chû'ng zawng zawng hnua a rawn sawi chhuaha chu, “Ngai teh, Lalpa bawinu ka ni,” tih hi a ni.

Keini pawh Krista hnungzuitu kan han nih dáwn hian, kan thinlungah hian hnawk a tam a ni, chhûngkua-ah hnawk a tam a, tin, mahni khawsak ngaihtuahna-ah hnawk a tam a, mahse Krista chu keimahniah hian lalbera a lo awm a, hotu a lo nih a, bawih kan nih ngam chu a ngai bawk si a ni.

A châng chuan keimahniin ‘i thu ang zêlin’ ti lo hian duh dàn kan neihte hi Pathian hnênah kan zawrh a, heti chin hi, chuti chin chu chutiang khatiang chuan lo ni sela, Nang chuti chinah chuan lo che la, lo chêng la, kan ti fo mai. Chumi remruatna, mahni invênna kulh hlîp lo hian Lal rawngbâwl hna hi ka thawk emaw tih hi a lo awl khawp mai. Mari chuan chû'ng zawng zawng chu a hnehin ‘i thu nise’ a ti mai a ni.

Mari chuan amaha thil awm zawng zawng chu a dah bo vek a: Josefa nêna an inkâr chu a buaipui ta lo, an chhûngkua a\anga harsatna leh mualphona lo thleng thei chu a buaipui tawh lo, chu mai ni lovin kha hmeichhiain a nau a paina, a pa pawh hriat loh a nih avànga a hun lo kal tùr, Juda dànah chuan pasal han hmuh leh ngaihna awm rêng rêng tawh lo tùrte kha a lungkham ta lo, tuna a lungkham ber chu, amah rawn dawrtu, amah rawn sâwmtu chu a thlang ta a ni, “Mualphona bawihah ka awm lo ve, pasal hmuh loh hlauhna bawihah ka awm lo ve, chhûngten min tuithlar hlauhna bawihah ka awm lo ve, kan hnam laka mualpho hlauhna bawihah ka awm lo ve, i bawih nu ka ni e,” a ti a ni. Lalpa i duh dan danin min ti rawh. I thu ni rawh se, ka chunga thil lo thleng thei tùr, ka chânna tùr nia ka hriatte, mite endawng leh hmuhsit nih ka hlauhnate chu dah \hain i tán ka in pe e, i thu nise kan tih a va pawimawh em!

Kan chhûngkaw buaina te , keimahni hun lo kal tùr (future) kan ngaihtuahnain min tihbuainate a awm a, kan pênna tùr kan pên thlen ngam loh châng a awm \hin. ‘I thu ang zêlin ka chungah thleng rawh se’ a tih tlat avàngin Mari nun chu amah Mari khân a chaih dáwn tawh lo va, amah a invéng dáwn ta lo va, amah a inbuaipui dáwn ta lo va, a intuk luhna Lalpa chuan Mari chu a véngin a \anpui dáwn a, a chhan dáwn a, a enkawl dáwn a ni, chu chu amah a invên ai khân a him zâwk a, amah a inngaihtuah ai khân a thlamuanthlâk zâwk a, amah a inbuaipui ai khân a thawventhlâk zâwk a ni. Chulai ram tak mai a chu kan dai ngam lo fo \hìn.

Dah bo tùr zawng zawng dah bo la, mualpho i hlauhna dah bo la, i lungkham dah bo la, nangmah i inbuaipuina zawng zawng, i invênna kha dah bo la, Lalpa kutah Mari ang hian ‘I thu ang zêlin ka chungah thleng rawh se’ han ti teh, ’tichuan i buaipui tùr emaw i tihte kha engtin nge a lo awm dáwn tih chu Lalpan a ngaihtuah dáwn a ni.

Mari tána buaipui awm hmasa ber Josefa hnêna va insawi fel chu Mari’n tih a tum tawh lo; amaherawhchu, Marin a tih dáwn si loh chuan titu an awm a ngai a ni. Lalpa kutah ani chuan a nghah tawh avàngin a va ti dáwn tawh lo a ni. Chu chu tuin nge ti? Pathianin a vântirhkoh rawn tîrin Josefa hnênah a zuk inlár a, Mari chungchâng thu sawi fel ngai awm zawng zawng chu Josefa hnênah hian Marin nilovin vântirhkohin a sawi fel ta zâwk a ni.

Lalpa hnênah hian a nih nih nih tùrah hian kan hlau \hìn a, a hlauhawm lo zâwka kan hlau hlauh a. Keimahni kan inbuaipui hian kan fel thei ngai lo; Lalpan min buaipui hian a lo fel zâwk zêl a ni. Chutah chuan Marin i thu ang zêlin ka chungah thleng rawh se,” tiin a nun chu a lo pe ta a ni. Chumi avàng chuan chhandamtu hi a lo piang a, vawiinah hian keiniho pawh hi chhandamtu chawimawiin kan lo au chhuak ta a ni. Chutiang ni tùr chuan Pathianin min sâwm a ni.

Kan kohhranah hian tehna kan hman fo \hìn chu kan hlim em, kan lâwm em, kan tui em tih hi. Kohhran a hlim loh a, kohhran a phur loh a, kohhran a tui loh chuan ‘kan chau’ kan ti a,Mahse Bible hi ngun takin han chhiar ila kan tuina chinah, kan phurna chinah hian nuamin hlimawm mah selangin hemi Krista hnungzuitu tak tak kan nih dáwn hi chuan kan tuina chin kal pelh a ngaih châng a awm \hìn a ni. Pathian Biak Ina inkhâwm tùrte hian a châng chuan kan châk lo \hìn a ni, kan tui lo \hìn a, kan tui chuan kan lo kal khâwm a, kan tui loh chuan kan kal tlêm ringawt a ni. Kan tui lo a nih pawhin, kan phur tâwk lo a nih pawhin, kan ch^k lo a nih pawhin, kan tuar zâwk dáwn a nih pawhin Lalpa ropuina tùr a nih chuan ke kan pên zêl a ngai a ni.

Mari ang hian Krista paitu /nunpuitu ni tùrin kan nun pum hlanin ‘I thu nise’ kan ti ve ngam dáwn em le?

II. CHAWIMAWINA I HLAN ANG U :

Ringtu nun \hang zêl tùr chuan Krista hnenah chawimawina kan hlan hi a pawimawh. Baptistu Johana nun a\angin lo zir leh ila:

Baptistu Johana hi pianphungah pawh mi danglam bîk Nazarit mi a ni a. A lo piang a, ramhnuaiah a awm a, a chawte lah chu mite ei ang pawh ni lo - khaukhuap leh khawizû a ni. Kawnghren mak tak mai a hrêng nghe nghe a ni.

Jordan luiah mi a baptis \hìn a; mi a hìp theihna chu a nasa êm êm mai a : Jerusalem khuaa mite, Judai rama mi zawng zawng te, Jordan lui dung vêl mi zawng zawngte an chhuak a, a hnên lamah an kal a (Mat. 3 : 5) tih a ni. Baptisma an chang mup mup reng mai a nia! Mite chawimawi leh ngaih ropui a hlawh hle tih chuta \ang chuan a lang reng mai. Zawlnei ropui lutuk angin a lang a, tunge a nih hriat an châk a, Jerusalem a\angin puithiamte leh Levia chi-a mite tîrin, “ Tunge i nih le? an ti a, ‘Elija i ni em?’ ‘Zawlnei kha i ni em?’ an ti a ( Joh. 1: 19-22), chawimawi an châk a ni. An nghahhlelh êm êm Messia kha a lo thleng ta ni-ah an ngai hial a, tihropui pawh an duh a ni. Mahse Baptistu Johana chuan, “ Ka ni lo ve...keimah aia mi ropui a lo kal dáwn e, a pheikhawk hrui phelh tlâk pawh ka ni lo ve... ( Luka 3 : 16) a ti ngar ngar a ni.

Johana hi chuan engmah hi chawimawi leh ropuina hi a inbel chhin duh hauh lo va, “Ani chu tlatlum tùr a ni, kei chu láng tùr ka ni,” a ti ringawt mai a ni. Lal Isua chanchin a ngaihven em em a, a zirtîrte nêna an \hut khâwm laiin Isua lo kal a hmu a, “Enteh u, Pathian beram no khawvêl sual kalpuitu tùr chu saw saw a nih saw,” tiin a zirtîrte kha a kawhhmuh a. Chutah leh, a zirtîrte kha Lal Isua zirtîr ni tùrin an tlan phei a; Baptistu Johana chu tlansanin Lal Isua chu an zui a ni. Mahse Baptistu Johana chuan thîk a hnehin a lawm zâwk a, Lal Isua kha zui vek se a ti hial zâwk a ni. Baptistu Johana hian Isua hi ropuina a pe a, chawimawina hi a hlân a ni.

Krista hnung kan zuina kawngah hian ropui ve kan duhna te, chawimawina dawn ve kan duhnate hian Chhandamtu hi a titláwm \hìn a ni. Mite chawimawi leh fak hi kan phût deuh em aw. Keini ngei pawh hian - miten thiam min ti se, fel min ti se, thawk taima, thawk \ha min ti se, inpe peih min ti se tih cháng kan nei fo ang. Chu chu mihring rilru a ni a, chu chu keimahni-ah hian a awm reng dáwn. Nimahsela chu nun chapo chu kan hup beh zêl chuan Chhandamtu chu chawimawiin a awm zêl zâwk dáwn a ni. Kan tihfuh deuhte a lo awm hian keini a hmanrua zâwka hian chawimawi leh fak kan lo beisei ve ngawt zêl a; Pathian ropuina hliahtu kan lo ni reng zâwk si a. Chhandamtu tak tak lo chu mite hian an lo mamawh tak tak lo. Keinina ropuina te, chawimawina te leh faknate kan lo dawn ve ngawt hian chung fakna leh ropuina te, chawimawinate chu kan khum reng theih si loh avangin kan nunin a tuar lo va, a tlo loh phah a, kan nun a lo chauh phah zâwk \hìn.

Lal Isua chanchinah lo pakai zawk ila : Sabengtung chunga a chuan khán tuman Sabengtung chawimawi an tum lo, a kalna tùra puan an phah zawng zawng kha a chunga chuang Isua vàng chauh a ni. Sabengtung chunga chuang kha a chhuk tawh chuan Sabengtung khán awmzia a nei tawh lo. Chawimawi tùr taka hian a \huthmun a luah loh hian rawngbâwltu / kan rawngbâwlnate hi miten an hnawl a, kan thawh dàn pangngai renga kan thawk emaw kan tih hian awmzia a nei phâk tawh ngai lo a ni. Setana thîk tham rawngbâwltu ka ni em? Setana thîk tham loh, a páwl nisa rawngbâwltu kan ni em tih hi inngaihtuah a ngai hlein ka hria.

Lalpa ropui nán chauh, Lalpa chawimawi a nih nán chauh miin hna a thawh chuan, Lalpa chauh kha a chhuan a lo nih tawh chuan chu nun neitu nun chu Lalpan a lo tidanglam a, amah (nun neitu) rawn chawimawi ve kha chu a chhuan Lalpa mawhphurhna a ni zâwk a ni. Chu nun tak chu Tirhkoh Paula khân a neih tlat avàngin khawvêlin a ngam thei lo a ni.

Baptistu Johana chuan, “ Kei chu láng tùr ka ni, Kei chu kawng siamtu mai ka ni, thlalera auráwl an tih mai kha ka ni,” a ti mai a. Keini hi chuan ropui kan inchuh lek lek \hìn a, chawimawi kan inchuh lek lek \hìn a. Hei hian kan ringtu nun hi a vaw chhia a, kan \hang hlei thei \hìn lo a ni. Chawimawi tùr dik tak chawimawi ila, fak tùr dik tak chu fak ila ringtu \ha kan ni mai dáwn a lo ni zâwk.

Rawngbâwlna-ah hian chanvo chi hrang hrang kan inpe diat diat \hìn a, hê’ngahte hian ken tùr dika hi hmun kan kian tâwk em le? Chhandamtu hi kan chawimawi zawh poh leh mite hnenah ringtu kan nihna chu a lo lang mai dáwn a ni.

Inzawt ila ka duh chu : Lalpa hi kan chawimawi tâwk em aw? Kan nun hian Lalpa hi a chawimawi em le? Ka theihna, ka thiamna a tlem si kei chu han chawimawi vak ngaihna ka hre lo kan ti pawh a ni mai thei e. Mahse chu ngawt chu a lo ni hauh lo: Matthaia 25-a talent tehkhin thu kha kan ngaihtuah chiang ngai em aw : Mi pakhat hnênah talent ngá a pe a,a dang leh hnênah talent hnih, a dang leh hnênah talent khat a pe a nih kha. Talent petu khan a pêk zat kha a hrechiang a nia! Keimahni-ah hian hriat fai vek loh hi engmah a nei lo a ni. Talent min petu hian kan kawlzat hi a hria a, eng theihna nge ka neih pawh a hria. Min pêka leh min pêk dàn pawh a inang lo nuk hlawm ang : a \hente chu hruaitu tùr te, thusawi tùr te, rinawm taka Committee member ni tùrte, thu ngaithla tùrte, thawh tùr a awma thawk tawp mai tùr te, a \hente chu Zaipáwl member nia rinawm taka awm mai tùr te, inkhâwm tlat mai tùrte pawh kan ni ang. 1 Kor-a Thlarau Thilpêk chungchang lam chu kan sawi vek séng lo vang a. Engpawhnise, I chakna tâwk te, i theihna tâwk te, i finna te, i remhriatna te, i remhriat loh deuhna te, i chak lohna zawng zawngte hi nangmah dintu Pathian hian a hria a ni. Pathian hian min pêk loh chu min \hing dáwn lo, min kawltîr loh hi chu min \hing dáwn lo tih hi hria ila. Pathianin kan kuta a dah hi kan tihpun tam leh min tihtîr tam dáwn a ni mai a; amaherawhchu, kan tihchhun pawh zelthel tak, sitawm taka kan tih chuan Lalpan min chhuhsak leh \hìn tih erawh hria ila, chu chu talent tehkhin thu-ah pawh khán kan hmu a ni : Talent khat neitu khân a tihpun loh avàngin, “Talent khat neitu kha laksak ula, a nei tam hnênah khán pe rawh u,” a ti mai a ni. Pathian mi hriat kan nih si chuan kan theih tâwkah Amah chawimawi leh a rawngbâwl tùr kan nih hi i hre thar leh ang u.

Lalpa chawimawi tùr hian Amah kan hriat dàn hi a pawimawh hle a. Misual kan ni a, hlim êm êmin lámin Lalpa chu fak \hìn mah ila : mi fel, Lalpa hmaa mi tling zo reng kan awm lo. Kan tih zawng zawng hian chhandamna a lei zo lo; chhandamna kan dawn hi khawngaihna avàng chauh a ni. Chuvàng tak chuan a ni Krista hi kan fak a, chawimawi a \ùl ni. Mari angin, “ Ka nunin Lalpa a chawimawi (Lk. 1:46) kan ti ngam ve em? Midangte tán malsâwmna kan nih a, nun tam kan neih hian, tam taka kan rah hian Pa chu chawimawiin a lo awm \hìn a ni ( Joh. 15 : 8).

III MILEM LAKAH I FIMKHUR ANG U:

He thu hi 1 Kor. 10 a\angin zir ho dáwn ila: Helai bung a\anga kan hmuh theih chu Israel faten thil sual tih an châk tlat anga kan châk ve loh nán min zirtîrtu, Korinth khaw mite tán / kan tán entîrna a nih thu tar lanna a ni a.

Israel fate chu thlalerah kum 40 zet mai an vakvai a. Pathianin Abrahama hnena a lo tiam ram- Kanan ram chu Aigupta ram a\anga hruai chhuahte zîngah Josua leh Kaleba te chauhin an luah a; Israel fate chu Pathian rin lohna leh a thu an awih lohna chuan Amah an tivui a, Thutiamtu Pathian an ring zo lo va, rin lohna chu sual a ni a, an zînga tam zâwk chuan thutiam chu an chhawr thei ta lo a ni.

Israel fate chuan an zînga \henkhatin nula an ngai a, ni khatah singhnih leh sangthumin an tlukhlum phah a, An zinga \henkhatin Lalpa an fiah a, rula tihborala an awm phah a, An zînga \henkhat an phunnawi a, tiboraltu tihboralin an awm phah a ni.

Israel fâte chu inangkhat vekin Pathianin a hruai a, chhunah chhum ding, zanah meialhin a hruai a, vahmim leh manna-a chawm an ni a. Thlarau lam chaw thuhmun an ei a, Tuipui Sen pawh an kai vek a ni. Khati chung khán \henkhat chu Pathian lakah an vui a, milem te an lo bia a, Pathian an tilungawi ta lo va, a tam zâwk chu thlalerah an tlûk hlum phah a nih kha.

Chutiang bawkin Korinth khuaa kristiante hian milem leh inthawina lam thil an lo tibâwlhhlawh veleh \hìn a, Kristian zinga tel bawk si nun hlui lama lungléng leh bawk sia an awm rem ti lovin ‘Lalpa no leh ramhuai no’ in kawpa ei kawp lo tùrin Paula hian a zilhhau a ni. Chawhpawlh nun neih a \hat lohzia, Israel fâte hnên a\anga zir tùr an neih tawh chu a hriattîr a ni.

Korinth khuate ang tho hi keini ringtu intite pawh hi kan ni ve lo maw? Eng nge Korinth khuaa mite aia kan \hat bîk lêm chuanna awm le?

Ringtu nun chu lawng nên tehkhin \hìn a ni a : Krista-a tuk a ni a; mahse khawvelah kan awm daih bawk si a ni. Khawvela kan awm chung hian kan nunah khawvel chu a lut tùr chu a ni chuang si lo. Kan nunah Khawvel a lut a nih vaih chuan hmantlak kan ni tawh lo; khawvel chuan ringtu nun hi a eichhia a ni.

Lawng pawh khawvêlah tuk a ni a, tuiah dah a ni ve thung a. Tuia dah a ni chungin a chhungah tui a lût tùr a ni si lo. Tui a luh vaih chuan lawng chu a pil mai dáwn asin. Tui chu a lût miah tùr a ni lo. Lawng chu a pawp a lo awm vaih chuan sawm pawh ngai lovin lût tùr tui tam tak a awm nghal a ni.

Chutiang chu ringtu nun hi a ni a. Khawvêlah kan la awm miau si avàngin kan nunah hian hmun awl, pawp a awm veleha luh mai inring reng sual hnathawh chu a awm tlat avàngin invéng renga kan awm a pawimawh a ni.

Chuvàngin, dinga inring chu fimkhur rawh se, chutilochuan a tlu dah ang e. Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tùrin thlêmna rualin tlan chhuahna kawng a siam nghal zâwk ang (10:13) a ti nghe nghe a. Pathian hian Amah zuitute hi harsatna, beidawnna, thlemna tuarna lakah min chhanchhuah a tum lo. Harsatna hmunah, beidawnna hmunah, thlêmna hmunah, tuarna hmunah a ni chhanchhuah a tum ni. ‘Thlêmna ka do zo lo a ni’ te kan ti mai mai ang e, kan tuar theih tâwk bâk hi Pathian hian kan chungah a thlen a phal lo tih i hre reng ang u.

An zînga \henkhat milem betu an ni ang khán milem betu ni suh u (10:7) tih a ni a, Duhamna hi milem biakna tiin Kol. 3 : 5 -ah chuan kan hmu a. Kan thil awh avàngin fate hian nu leh pate thil kan tihsualtîr a nia! Corruption-ah nu leh pate kan hnûk lût a...\halaite pawh hian nu leh paten an tlin tâwkah lungawi mai kan chìn hi a pawimawh hle a ni.

Kan ramah dik taka ti hi chu kan vânduai dáwn emaw kan ti tlat mai a! Mi neih ang nei pha dáwn lo va inrin tlatna hi a awm a. Dik tak leh fel taka Lalpa hmaa Amah ringtuten hna kan thawh hian mi aiin kan rethei dáwn emaw tih tùr a ni lo. Rinawm leh dik taka kan tih hian kan rin Pathian hian min rul dáwn khawp. Leiah pawh min rul ang. Van thlen thlengin min la rul cheu dáwn asin.

Thil dik lo inhrilhfiah dik chawp ngai lakah hian ringtute chu kan fihlim tùr a ni ang. Dik tak leh fel takin nung ila, dik tak, fel takin ti mai ila, Dik tak, fel tak dawng mai ila,kan tlachhe bik dáwn chuang lo. Bible hian a lo sawi chiang khawp mai : Sam 37:1-ah chuan ‘Thil \ha lo titute avângin intilungngai duh suh la. Fel lo taka tite chu awt hek suh, hnim hring angin an la vuai dáwn si a tih ziak a ni a. Tin, cháng dangah pawh : ‘I awm dàn tûr chu LALPA chungah nghat la; Amah chu ring la, aman a ti vek ang’ (Sam 37:5) tih a nih kha.

Hla phuahtuin ‘Kan hmaa mi huai kalte kha an ding nghet he hmunah hian’ a tih angin kan mi hmasa, Pathianin a koh leh a thlan te, a thu puangtu atána a mi hmante kha Pathian tán an rilru leh an taksa an lo va pe nasa a nia. Khawvêl sum leh pai, hausakna leh ropuinate kha an va han hnawl ngamin an Pathian tán an lo va ding nghet tehlul êm! Sualna tam tak, thlêmna hautak takte chu ngamin an ding nghet hle a ni.

Mosia kha Aigupta ram finna zawng zawng zir zo, Pharoa lalna rochun thei tùr ni hial âwm a ni a. Mahse, Pathianin a kohna leh Pathian a hriatna lam kha a rilru thununtu zâwk a ni tlat mai a. A mite hruai chhuak tùra Pathianin a koh chu zawmin Aigupta sum ropui hausakna leh lalna ai chuan a kotu chu hmangaih zâwkin a kal ta a ni (Heb. 11:2426).

Josepha pawh kha Aigupta-ah Pathian chawimawina a dáwn avàngin an hotu ber ang hialin Pharoan a dah a nih kha. Kha tiang dinhmun kha chelh mah sela, a lalna-ah khân Pathian a \ih hle a ni tih a hriat theih a. Thuneihna hmang sual duh sela chu thil tithei tâwk dinhmunah a ding ve a ni. Mahse a chanchin chhia leh mawi lo kan hre lo a ni.

Tin, Daniela te pawh Babulon lal Nebukadnezzar-a khân a hnuaia hotu pakhatah a dah a. Pathian a \ih avàngin Pathianin a chawimawi a ni. Mahse, a Pathian \ih tlatin thil \ha lo lakah invêngin Lalpa chawimawi a duh tlat zâwk a nih kha. An rinawmna-ah leh an nun khân Isua chu hla tak a\anga hmuin chibai an lo bûk a ni.

Anni lo pawh mi huaisen, rinna pa tih tling kan hmu hlawm. Chû'ngho chuan khawvêl hi an ram tùr a ni lo tih an lo hria a. Khawvêl thil chu hnawmhne ang lekin an lo ngai hial a ni. Hebrai ziaktuin a sawi ang khân khawvêlah hian khualzin mai an ni tih an inhria a, awmna tlâk, inbenbelna tlâkah an ngai lo a ni. An lung tilêngtu chu Lalpa ram, ram \ha leh zual, vâna awma chu a ni tlat si a (Heb. 11:16).

Ram \ha leh zual, Lalpa ram, vâna awm chu kan lung tilêngtu a lo nih a, engkim kan tih apiang Lalpa ropuina tùr a lo nih a, engkimah keimahni thu dah lal lova ‘I thu nise’ kan tih zêl a, keimahni intihropui tum lova Chhandamtu chu chawimawina, ropuina zawng zawng kan hlan zêl a, Israel fate anga thil sual an chak ang bawka kan chak ve loh nan Lalpan a Thu Thianghlim malsâwm rawh se. Amen

AVK|P Inkhâwm : 13072009