Sermon - TITA ( Bible Study / Character Study)

Chhiar tur

II Kor. 8:16 : Tin, in chunga ka \hahnem-ngaihna ang Tita thinlunga pe thintu Pathian hnenah chuan lawmthu awm rawh se.

Tita 3:8 : “Pathian ring tawhte chuan thil \ha ti zel turin ngaihtuah rawh se,”

Tita Chanchin tlangpui :

Tita hi Jentail Kristian, Grik mi a ni a (Gal.2:3). Paula \hian leh rawngbawlpui \angkai tak a ni. Paula meuh pawhin “Rinna ka fa tak tak (Tita 1 : 4) a tih avangin Pisidia rama Antiokei leh Pisidia rama a chhehvela rawng a bawl laia piangthar a nih a rinawm. Paulan “Ka unaupa (II Kor 2 : 13), ka \hian leh ka hnathawhpui’ ( II Kor. 8 : 23) a ti hial \hin a ni. Jentail-te zinga rawngbawlna chungchanga Jerusalem-a Kohhran hruaitute ráwn tura Paula leh Barnaba an kal khan Tita hi an hruai ve a ni (Gal.2:1). Paula lehkhathawn pathumah chiah a hming hi tar lan a ni na a (Kor. , Gal., 2 Tim.), Korinth khuaa Tirhkoh Paula Lehkhathawn pahnihna-ah hian Tita hming hi vawi 9 lai mai a lam a; Korinth khua-ah hian Paula hian vawi 3 lai mai a tir niin an hre nghe nghe a ni. A vawi khatna chu Jerusalem \ám \anpuina thawhlawm buatsaih turin a ni a ( II Kor. 12 : 18), vawi hnihna chu Paula lehkha pe tur leh an Kohhran buai \helh turin (II Kor. 2 : 3,4 ; 7 : 8,13,14), a vawi thumna chu lawmthu sawina lehkha keng tur leh a kal hmasak lama thawhlawm lo buatsaih tura a tih kha la khawm turin a tir a ni ( II Kor 8 : 6,10, 16,17,23,24). Hetiang ti tura Paulan a han thlang hi tleirawl te mah nise, thusawi thiam leh mi hneh thei tak a ni ngeiin a rinawm.

Tirhkohte Thiltih lamah hian a hming a lang lem lo na a, lehkhathawn lam a\ang hian Paula leh Tita hian rawng an bawl dun nasa hle tih a hriat theih a ni. Kret thliarkara Kohhran enkawltu atan Paulan a ruat a (Tita 1 : 5). Ziaktu \henkhat chuan Kret thliarkara Bishop hmasa ber niin an sawi nghe nghe. Khawthlang Kohhran \henkhat chuan January 4 hi Mithianghlim Tita ni-ah an serh a; khawchhak Kohhran \henkhat chuan August 25 hi Tita ni atan an serh thung. Tirhkohte Thiltih 18 : 7-a Tita Justa, Paula thlen in pa nen hriat pawlh loh tur a ni.

Thawn hun leh thawn chhan :

Tirhkoh Paula te nena an zin ho khan Tita chu Kret thliarkarah a thiltih fel bakte a tih fel zelna tur leh a thupek anga khaw tinah Upate ruat turin a cham bang a.

Thil pathum thlur bik a nei a :

1) Kret mi tam tak hi mi sual hmingthang an ni a, an zinga Kohhran hruaitute chu mi eng ang mi nge an nih ngei tur thu sawi chian a \ul.

2) Upa deuhte pitarte leh bawihte zirtir dan tur hrilh a duh bawk.

3) Krista nun zai dam leh nelawma awm tur leh Kohhrana inhuatna te, inhnialna te leh in\hennate pumpelh turin a fuih bawk a ni.

Chutih lai chuan he lehkhathawn hi Paula hian a thawn a ni. A thawnna hun leh hmun hi chiang faka sawi theih a ni tawh lo na a, pawm dan tlanglawn ber chu A.D. 61-63 a ni a; chutih lai chuan October 64-a Nero-a tihduhdahna lo in\an kha a tar lan miah loh avangin AD 59-61 aiin a hma thei lo a ni ti an awm bawk. Tin, Rome Tan Ina a tan hmasak ber, a chhuah hnu lawk Nikapolis a thlen hma sia a thawn niin an ngai bawk a ni.

A bu chhung thu :

Hlawm 5 in a \hen theih a:

1 : 1- 4 : Thuhmahruai leh chibai bukna

1 : 5 - 16 : Kohhran hruaitu turte

2 : 1- 15 : Kohhran mi hrang hrang tih tur

3 : 1-11 : Infuihna

3 : 12-15 : Thutlangkawmna

tiin sawi \hin a ni a.

Kohhran hruaitu tur a han tar lan hi :

Kohhran hotu chu Pathiansum enkawltu a nih avangin sawiselbo ni tur a ni a han ti te te a : An nih tur a han tar lang a: tupawh sawiselbo, nupui pakhat nei, fate Pathian thu ring, nawmsak bawl lutuk kawnga sawisel hlawh lo, dan ang lova awm lo nei an nih tawh phawt chuan, mi lawm dan thiam, tha lam duh, rilru dik tak, mi fel, mi thianghlim, insum thei mi ni zawk tur a ni a; zirtirna dik tak kawngah chuan mi a fuih theihna tur leh, hnialtute chu thiam loh a chantir theihna turin zirtirna ang zel thu rinawm chu pawm tlat mi ni bawk tur a ni.

An nih loh tur lam a han sawi leh a:

Mi tihmawh, thin ram, uain ruih hmang, mi velh hmang, hlepna bawlhhlawha duham mi ni tur a ni lo va (1:7)

Heng hi a han tih duahna chhan nia lang chu Kret thliarkarah hian Serhtanho zingah Dan ang lo va awm, thu sawi mai maite leh tihdertute mi tam tak an awm a, tin, hlepna bawlhhlawh duh vanga thu zirtir loh tur zirtirin, mite a chhung chhungin an chawk khaw lo si \hin a. Anmahni zinga mi, anmahni zawlnei pakhat ngeiin, “Kret thliarkara mite chu dawthei te, sakawlh sual te, thatchhe chaw hehte an ni fo mai,” a tih hian an dinhmun chu a lailang chiang hle mai. Chungho han tukawl nan chuan a ti a nih hmel. Chungho ka chu huhsak tur a ni. Chu thu hriattir chu a dik a ni. Chuvang chuan Judaho thawnthute leh thutak hawisan \hinte thupekte chu ngaihsak lovin, rinnaah chuan an dik theihna turin na takin zilhhau rawh a ti a ni.

Kret thliarkar mite hian Pathian hria an inti a, tenawm te, thu awih lo te, thil \ha tinreng tih kawnga Pathian duh lohzawngte an ni, chu an nunah lang lovin an thiltih chuan Pathian an hlat si a ni.

Kret thliarkar mikte nen hian kan ram Kristian awm dan hi a inang khat mai lo maw?

Bung 2 naah hian nun dan ( nun chhungril ) pawimawhzia Paulan a sawi leh a. Thurin dik chuan rah \ha a chhuah \hin thute a sawi a, Tita chu tih tur a pe nghal a. Mi chi hrang hrangte awm dan tur a han sawi a:

Mi chi hrang hrangte awm dan tur :

Putarte a\angin bul a han \an te te a, an awm dan tur chi 4 a han sawi a :

1) Insum thei ( a awmzia tak chu uain laka fihlim)

2) Zahawm

3) Rinna leh hmangaihna leh chhelnaah dik tak ni turin fuih rawh a han ti te te a.

Pitarte awm dan tur a han sawi ve leh a :

Pathian Thu chu sawichhiata a awm loh nan, la nula deuhte chu an pasalte hmangaih tur te, an fate hmangaih tur te, rilru fel taka awm tur te, thianghlim taka awm tur te, mahni ina thawktua awm tur te, ngilneia awm tur te, anmahni pasalte thu thua awm tur tea an thunun theihna turin an awm dan renga Pathian zah mite niin, hektute leh uain heh mite ni lo va, \ha lam zirtirtute ni turin.

Tlangvalte awm dan tur a han sawi ve leh a:

Tlangvalte chu rilru fel tak pu tura fuih turin Tita hi a chah a, Amah Tita ngei pawh engkimah thil \ha tih kawngah tihhmuhtu-ah intilang turin a chah bawk a, Lehlama \angte zinga miin kan chungah thu \ha lo reng sawi tur an neih loh avanga an zah theih nan, a zirtirna-ah chuan a takzia te, a zahawmziate a thu sawi dikzia sawisel rual lohte chu tilang turin a hrilh bawk a.

Heta thil pawimawh tak chu "Lehlama \angte zinga miin kan chungah thu \ha lo reng sawi tur an neih loh avanga an zah theih nan " tih hi. Lehlama \ang han tih hian ringlote sawina a ni a, hla pakhat - 'Miten min chhiar, min thlir reng e, Ka awm dan zawng zawng min hai lo, Krista nun mawi leh Chanchin |ha, Keimahah hian hmuh an chak \hin'

tih nen hian sawi zawm a remin ka hria. Ringtute hi miin min thlir reng a, kan nunah hian hmuh tur an hmu ngei ang em aw....Tita hi ava entawn tlak em! Tita chu a zirtirna-ah chuan a takzia te, a zahawmziate a thu sawi dikzia sawisel rual loh te chu tilang turin Paula meuhin a chah a, ani hi kan entawn tur pawh a ni ang.

Bawihte awm dan tur sawi ve lehin : Bawihte chu hna hnuaihnung ber thawk an ni tih kan hre \heuh awm e. Pathian min Chhandamtu zirtirna thu engkima an cheimawi theih nan, hnial lovin, kutkem hmang lovin,rinawmna \ha zawng zawng tilang zawkin, an pute thu thua awm tur leh, engkima an lawmzawnga awm turin fuih rawh a ti ve leh a.

Chang 11 a\ang hian a kalphung a rawn thlak ve leh a, Kristian nuna pawimawh ber, bul in\anna pawh a tih theih hial awm e.

Chhandamna thu, thu pawimawh elkhen mai a rawn tar lang a. “Mi zawng zawng hnenah chhandamna rawn thlenin Pathian khawngaihna a lo lang ta si a; beiseina lawmawm – kan Pathian ropui tak Chhandamtu Isua Krista ropuina inlarna chu – nghakin, Pathian ngaihsak lohna leh khawvel châknate bansanin, tun lai khawvelah hian insum leh fel tak leh Pathian ngaihsakin kan awm tur a ni” tih min zirtir a.

Ani chuan bawhchhiatna zawng zawng lak ata min tlan theihna tur leh, chi thlan bik, thil \ha tiha \hahnemngai, ama tana a tihthianghlim theihna turin kan aiin a inpek thute tar langin chung thu pawimawh tak mai chu hrilh a, fuih a, zilh turin a ti a.

Bung 3-na-ah hian thil \ha tih zel chungchang tar langin : Lalte leh thuneitute laka intulut tur te, thu awih tur te, thil \ha tinreng tiha inpeih tur te, tumah sawichhe lo tur te, kawhmawh bawl lo tur te, mi zawng zawng laka thuhnuairawlhna tinreng tilanga nunnem turtein a ti leh a.

Kristian inti ve si, sawrkar leh mahni thiltihnaa Kristianna lang leh si lo chu ngaimawhin sawi nawn a, hriattir nawn leh turin a fuih a ni.Krista a hmuh hmaa a nun awm dan Paulan sawiin " a tak te, thu awih lo te, buma awm te, châkna leh lawmna tinreng rawngbawl te, sual leh itsik hmanga awm te, tenawm te, inhaw tawn te kan ni si a," tiin. Thil fel taka tih a, mahni ngeia tih an duh a, thiltih, mahni ngeia tih avanga chhandama awmna tur emaw tiin an beih laiin siamtharna silna leh Thlarau Thianghlim siam\hat lehna chuanin a khawngaihna ang zel zawkin min chhandam tâk thu a sawi a. Khawngaihna avang chauha chhandam / thiamchantir kan nih zawkzia a tlangaupui a.

“Pathian ring tawhte chuan thil \ha ti zel turin ngaihtuah rawh se,” tih thu huai taka a hrilh tlat a duh thu a sawi a. Thil \ha tih chu mihringte tan a thain a sawt thu a sawi zui bawk a.

Nimahsela thil sawt lo leh engmah lo : zawhna âtthlâk te, Dan thua insualna te chu hawisan zel turin a fuih bawk a.Rin hran nei mi chu vawi hnih khat zilh hnu chuan zilh duh tawh suh a ti zui bawk a. Chutiang mi chu a kal pengin a sual a ni tih in hria e, amah leh amah thiam loh inchantir a ni si a la ti zui a.

Bung 3:12 a\ang chuan thuchah hnuhnung sawiin, thlasika awm a tumna Nikopoli-a kal hram hram turin a chah a. Zina, dan hretu leh, Appollova chuan engmah an tlâkchham loh nan an zinna-ah chuan \hahnemngâi taka puibawm turin a chah lawm lawm bawk a. Thuchah hnuhnung ber sawiin "Kan mite chu tlâkchham an neih ngai loh nan hna \angkai thawka inhmang reng turin fuih la, an awm mai mai tur a ni lo" tiin.

A thutawpna hi a pawimawh khawp mai : Kret thliarkar dinhmun pawh a sawi chiang viau mai a. Anmahni zinga mi, anmahni zawlnei pakhat ngeiin, “Kret thliarkara mite chu dawthei te, sakawlh sual te, thatchhe chaw hehte an ni fo mai,” tiin a sawi kha. Ringtute tan thatchhiat hi thiang lo tluk a ni, ringtu awm mai mai, ringtu mu mai mai, ringtu thatchhe chawheh nih ngawt mai chuan \hanlen ngaihna a awm lo a ni. Kan thawh tawk zelah rinawm taka thawkin, theihtawp chhuah ila, hna tê lua a awm lo va, lian lua pawh a awm lo ang. I thawh theih / phâk chin pawh thawk lo va mi thawhchhuahsa ring ringawt i nih chuan Tirhkoh Paulan ringtu \ha-ah a chhiar kher lo mai thei che a ni.

Kan thu hnuhnung atan 3:8 “Pathian ring tawhte chuan thil \ha ti zel turin ngaihtuah rawh se,” tih hi han sawi zui lawk ila. Pathian ringtute chuan thil \ha kan tih zel miau chuan kan hma-ah Setana’n tawktarh eng hmang pawhin min thlêm mah se kan tlan chhuak thei dawn a ni. Thil \ha kan tih hian Setana chu kan khuahkhirh a ni tih hria ila. Kan inkhâwmte, mi kan \anpui te, kan phâk tawk ang zêla hna kan thawh leh rawng kan bawlte, mi sawichhe lo leh thuhnuairawlha kan awmte, kawhmawh kan bawl loh te, kan hmaa tih tur awm kan hlen leh kan awmna tur dik taka kan awm hian thil \ha ti kan ni tih i hria ang u.

Kret thliarkar mite hi Kohhran mipui ang pawhin a tehkhin theih a, Tita hi rawngbawltu / hruaitu, Paula hi Pathian ang pawhin. Rawngbawltu kan nih chuan Tita ang hian Paula fuih ang hian kan awm em? Member pangngai kan nih pawhin Kret thliarkara mi ang lek hi kan ni em? tih inzawt ila.

Israel fate anga Kanan ram pana kawng thui tak kal ve siin ram tiam Kanaan thleng lovin kan awm palh ang tih hi a hlauhawm hle a ni.

Thil\ha kan tih zel chuan ‘Kan hnena awm reng tiamtu kha tunah pawh a la pangngai reng a ni. Tichuan thil \ha tih i ning suh ang u; kan inthlahdah loh zawngin a hun takah chuan kan seng dawn si a (Gal.6:9).

LALPAN kan za atan malsawm rawh se. Amen.

13052008