A sakhmingah Hrângzâwna an sa a!

A sakhmingah Hrângzâwna an sa a!

-Ellis H.Pachuau

Hmanlai chuan an tia lãwm : Nu-in nau a hrin hian naute chuan lái hrui a rawn awrh chhuah chuan Láiawrha/i an sa mai a. A láihruiin a lo vêt deuh a nih leh Láivêta, Láibâta leh adt. an ti leh mai a.  Mipa an pian zawn deuh chuan Pazâwna, hmeichhia an pian zawn deuh chuan Nuzâwni an ti mai a. An thlahtute zîngah pasal\ha, sa kâp thei an awm chuan Kâpkunga, Kâphlira leh adt.an sa leh mai bawk. Buh ngah kum, teh sâng hial thar kumah a lo piang hlauh a nih chuan Sângthanga, Sângneia, Sângtlina leh adt. an ti leh mai bawk \hìn. Lal hming sak dâl lo khán hming kha sak a ngai bawk si a. Chumi khami neih kum tih vêlah Kar-in sa a kah hliam chhuiin pa pakhat a kal a,  a hma táwng páwlah \angin a hnu deuhah fa a han nei a,
Hrângtawna an sa ta mai a. German rál an lo lian a, chumi do lêta kal vete chuan chumi an thiltih hriat reng nán chuan, an fa emaw an tute hmingah chuan German hming chu chawiin Germanthanga, German Ralngama leh adt. an sa leh mai a. Mizoram zalênna sualin Hnam sipaite an rammû a, chumi  hriat reng nán chuan Zoramchhana te, Zoramchhansanga te an lo piang nawlh nawlh mai. Tlêma thleng thui deuhte chuan Ramfangzauva/i an ti lehzêl a. Khawthlang ram  lal chhûngkaw hming chawiin sap hming Robert, John leh adt. te, Bible-a hming Joseph, Samuel tihte kan pu ta zêl bawk a nih hi.

Ran kha chu a rawng leh an taksaa chhinchhiah rem dàn ang zêlin a hming an sa a. Bawngpui dum an neih chuan Dumi an tih loh leh Hangi an ti a, an bawngpa sen chu Sentea an ti leh mai. An bawngpa ki bul pawh Bula an ti leh mai bawk a. An vawkpui dum leh var inpawlh pawh Rangi an tia...a var chu Vari.

Hrângzâwna an sak dàn thung hi chu: Ngaiteh, mizo hnam sipaite chuan khaw hrang hrangah khan tawmbûk deuh an nei \hìn a. Hemi hian khawvêl êng a rawn hmuh hma hauh khán a chhûngte chaw pawh an eisak ve nual a ni âwm e. Tûk khat chu Pa lianpui, sam sei ngouh mai, Fârkawn khua Lalsailova chuan silai mu pakhat hmangin savawm pahnih hi a kap roh a! Savawm chu pi leh pute chuan sahrânga an chhiar a lo ni vei kher nên khán,  chutia savawm thingkunga awm silai mu khat hmanga pahnih a han phir tak lai vêl báwr chuan he nau hi Inrinni fehrehsan(lehlin tharah chuan dar 10!) laiin a lo piang reuh a. ’Tichuan, Vawm\hianga sa lovin Sahrâng a kah zawn lai chu changchawiin a kâptu chuan Hrângzâwna a sa ta a ni. Fa hming koh ber a\anga Hrângzâwna han nih \an ngawt mai chu pui tak a ni! A nau lo piang leh pawh Hrângzuia lo ti leh ta pawh nise a mawh lo ve!

Pa pakhat chuan, “Tun lai hi chuan hmingte hi an phuah ang bawrh bawrh a, kei chu ka fate hming hi chu ka sa vek,”a ti! Hming hi thlûk nei lo-ah chuan sak chi a ni, phuah chi a ni lo rêng a ni. Kristianna azârah vân lam hawiin Lal hming sak dal lo tih lam ngaihtuah tawh lovin kan duh hawi zawng zawngin kan sa ta a: Lalthianghlimi te pawh bal tak, \awp tak te an lo ni a. Vanramngaii te pawhin Pathian thu an ngaihsak vek lo va, Lalfakzuala te pawhin mi aia nasain Lal chu an fak vek bîk hek lo. |hian inkawm khâwm hlawm khat hian an hmingah sâp hming a tel deuh vek a, pakhat chiah hian Sâp hming a nei tel lo a ni âwm e. Chumi chuan sâp hming a duh ve a, amah leh amah chu Ricky a inti a ni âwm e. Mahse, a \hian dangte chuan R.K. an ti leh daih si a! A sâp hming sak ve chu a bo chu a ni der mai! Hming hi chu kan han sa a, a mawi deuhte kan han thlang deuh a, chhinchhiahna mai a ni a, hriat hran theih nihna tùr mai kha a ni. Mi sâp hming neite hi kan lo ngaimawhin sâp an ni-ah kan lo ngai ngawt ang e : an chhinchhiahnaah sâp \awng a tel a ni mai. Chu zawng chu.

1.4.2011