Zoom Lens lian ber world record-a Zoom ka duh ngawt mai!

Zoom Lens lian ber world record-a Zoom ka duh ngawt mai! 

-Ellis H.Pachuau 07102012

Zan rei tawh lam, naktuk a nih tawh hnuah Mobile a rawn rum vung vung a, nula hmel\ha deuh hlek, min vei em avanga mu thei lovin inthlahrung taka SMS chhiar nuam zet mai min thawn dawn emaw tiin phur zet maiin kan han hmet hawng a, SMS thawn tur hmu zo lo \hianpa KC Ruata ten ...some text missing....tih ngai khawp SMS a thuia thui, a seia sei mangkhen, vawi hnih vawi thum SMS update hnua hmuh kim theih chauh mai lehnghal chu min han thawn \hin chu a nia!

Amah inchei ngaina lo, hnar hmul bak beng lut ngai reng reng lo khan keini Pathianni a lo nih dek deka uite bo ang maia nghawnga inthlung reng kha min han hmu khawro ta a nia le! A bible chang reference nei zawnga mi hlate hnuh hnaih kan tum mek laiin pathian biaka a biak loh chauh, a taksa bung hrang zinga tel ve ta mai ni awma mawi, a Camera changchawiin, “Kawng engkimah mi hlate hnuh hnaihna \ha tak chu Zoom lens hi a lo ni e...” a lo ti thul! Kalvari rim a nam lo lutuk hian ka hria a! Amah hi Zoom Lens lian ber world record-a Zoom ka duh ngawt mai! 

MUT NACHáNG HRE LO, THAWH NACHáNG HRE LO MIN TI

MUT NACHáNG HRE LO,  THAWH NACHáNG HRE LO MIN TI

Mahni tuina lam záwng tak te lo ni mah se Article pangngai ziahsa neih hi thil har tak a ni \hìn tih hi ka hre chiang ta hle, a chhuahna hmun tùr azirin. Hei tunah pawh hian ziahsa ka neih lehpek lo a! Tun kar Nilaini zan inkhâwm bân khán Committee meeting tùra kan \hut \hap hnu-ah Phone Call ka dawng a: BENGVARNA Article column-a thuziak tùra sâwmna thu ka dawng hi a lo ni a.

  Hei leh chen hi ka lo tlangvál ve ta a, tlangval chhûng hian meeting hrang hrangah ka tel hnem ve narawh e. Min rawn biak laia kan meeting pawh hi nikhata a vawi thumna tùr kan \hu khâwm mêk kha a ni a. Buai hi chu a buai theih ram ram hle mai. Thawh\anni zanah Group O.B. kan han \hu khâwm a, Thawhlehni zanah branch K|P, Nilaini chawhma lamah Office lam Welfare, chawhnu lamah Football Association lam, zanah inkhâwm banah K|P Group Committee kan han \hu khâwm ta kha a ni a. Thil inang lo tak tak ngaihtuahna sênga meeting ka neih tlut tlut lai tak maia Article ziak tùra sâwmna ka han dawng leh ta chu manganthlâk tak chu a ni. Sâwmna zahawm tak hi han hnawl mai pawh ka duh rum rum a; nimahsela, a lehlam zawngin ka ngaihtuah thuai a, kum 7 él-eu Chanchin Bu enkawltu lamah ka lo awm ve tawh avàngin, ka tawnhriat a\angin chhuah tùr zawnga kan buai \hinzia leh kan mamawh lai taka hmun ruak hnawh khat thei an awm \uma kan lâwm \hinziate kha ka hre chhuak nghal uaih uaih mai.

E heu! E heu!

E heu! E heu!

-Ellis H.Pachuau

Lennaten Korean film Mizo \awnga lehlin an en miau chuan rilru-ah Zonet Mizo Idol 2011 intihsiak neih zan ni raw sek sek: a hmuhnawm kan ti emaw kan ti lem lo emaw , mahni inah kan en ngai lo va, engtiang pawhin mahni tawkin lo do ve bawk \hin mah ila, kawngka lu chungah ka hming ziak a intar a, Ration Card holder ka ni pawh lo ti vein, duhtawkin mahni inah chuan lo vawk lal len pawh ni ta tehreng ila : keini aia thu nei awmna hmunah chuan Cartoon pawh min lo hlui se, Langsung pawh min lo chhawpchhuahsak nise, Mizo Tarzan Roluaha film emaw Zocartoon – Liandova te unau pawh min lo hlui se, Flame of Desire (In Mizo) , Temptation of an Angel (In Mizo) pawh lo tichhuak se ihe lovin kan en a \ul \hin. Chu chu lei dan a ni miau si.

THIHNA TûR

THIHNA TûR


Changtute
Muana : Tlangval fel tak
Manuni : Nula, Drugs addict ngaizawngtu
Fela : Chhûngkaw pakhata hotu/pa ber
Sangtei : Nula, Fela fanu
Zara : KTP Hruaitu
Rini : Nula, Muana \hiannu

A sakhmingah Hrângzâwna an sa a!

A sakhmingah Hrângzâwna an sa a!

-Ellis H.Pachuau

Hmanlai chuan an tia lãwm : Nu-in nau a hrin hian naute chuan lái hrui a rawn awrh chhuah chuan Láiawrha/i an sa mai a. A láihruiin a lo vêt deuh a nih leh Láivêta, Láibâta leh adt. an ti leh mai a.  Mipa an pian zawn deuh chuan Pazâwna, hmeichhia an pian zawn deuh chuan Nuzâwni an ti mai a. An thlahtute zîngah pasal\ha, sa kâp thei an awm chuan Kâpkunga, Kâphlira leh adt.an sa leh mai bawk. Buh ngah kum, teh sâng hial thar kumah a lo piang hlauh a nih chuan Sângthanga, Sângneia, Sângtlina leh adt. an ti leh mai bawk \hìn. Lal hming sak dâl lo khán hming kha sak a ngai bawk si a. Chumi khami neih kum tih vêlah Kar-in sa a kah hliam chhuiin pa pakhat a kal a,  a hma táwng páwlah \angin a hnu deuhah fa a han nei a,

Kan damchhûng nîte chhiar dàn tùr min zirtîr ang che

Kan damchhûng nîte chhiar dàn tùr min zirtîr ang che

-Ellis H.Pachuau

Hmanni lawk chauh kha emaw kan ti a, khami kum a\ang pawh khán krismas vawi 25 kan lo hmang leh dáwn reng tawh hi a lo ni a. Kan Lalpa pian a\anga kum Sangkhat Zakua Sawmriat leh Paruk a ni a, K|P member ni tùrin kum MLA term khat tehmeuh ka la hmabâk a. Ngaiteh, a hun a lo thleng ta nge nge a. Kan khua-ah chuan nidanga rawn kal ngai lem lo leh lo kal ve tawh \hìnte chu an rawn pung khâwm a, khual \ha chu an rawn kal nguah nguah a. Engtik lai maha awm nawn leh tawh rêng rêng lo tùr Bial Inkhâwmpui hnuhnung chu kan Kohhranin a thleng a lo ni reng a.

HRINGNUN

Ka naupan tet a\angin Pathianni hian lehkha ka zir ngai lo va, pawl tinah a thiam berte zingah mi ka ni chho ve \hin. Pawl Sawm ka zirlai phei chuan lehkha ka zir dawn apiang hian Bible ka chhiar ziah \hin a : Thuthlung Thar leh Sam hi ka chhiar chhuak der mai! Pawl sawm ka nih kum vek khan Chawhnu inkhawmah inkhawm kim ka tum ve tawp a, chhiar kim zat lo mah ila tum na na na chuan a inkhawm \hat theih khawp mai. Inkhawm a hun hi chuan han inkhawm tlat mai ila, chu chuan kan hriat loh hlanin kan rinna kawngah min pui a, min lo tinghet daih hi a lo ni a. Tun hnua ka ngaihtuah let hian ka inchhir lo a ni. Khatih hun laia ka sikul kal rualpui, inkhawm ve ngai lote kha Pawl Sawm pawh pass thei lo te, P.U.-a zuzi ta mai mai te, ruihhlo ngawlveite an ni deuh vek nia! Tun hnuah pawh hian inkhawm \hulh meuha hnathawh \ul chang a awm \hin a, inkhawm \hulha hnathawh pawh hi tihnawn leh ngai zingah hian a lo awm duh khawp mai! Lehkha thiam thei tak, pawl tina ti\ha \hin Pathian \ih lem lote pawh hian Pathian \ih ta se hei ai hian an ti \ha ang tih hi ka ring tlat \hin.

            Hringnunah hian thinrim changte, miin min hmusit emaw min tiduhdah riaua hriat chang ka nei \hin a : Matthaia 6 : 8 hian ka inhnem \hin a, manganna han tawh hian Sam 37:5 hi ka hre chhuak fo \hin. Rawngbawlna kawngah hian buai bik, hah bik nia inhriat hi a awl viau \hin a - Kolossa 3 : 34, 24 hian chu’ng hunahte chuan min chhawk \hin. LALPA hi a lo va \ha em!
 
VENGLAI Chanchin Bu 23.1.2010

Ka Thianpa Tìtî Part - I

Ka \hianpa’n a tia lãwm : Keini ve hi chu’h - Nidanga sa ei ngai lo tih takah Krismas leh kumtharah kan lim nghek a, kuain a zõ lo a, min zût hrep a. Kut khawng tâwk vêlin Masi báwr vêlah kan chàwl a, kumthar ruai \heh zawh rual rualin kan hna tùr kan ngaihtuah tawh mai \hìn a. Kan hnathawh tùr lah chu mitthlá-ah a lang sa nghal rùn a. Krismas leh kumthar vuakvetah kan kut pawr pawh a lo mâm ve deuh a, kumthar tûk a\angin hnathawh kawr meikhu rim nam vut vut mai, khawng reu ro kan hà a, iptepui ung khek khuk, a mawng pawp tihpin nána chhûng lama hruikháua \awn bàwk, páwn lam a\anga îp \ût mai chhûngah lungtát nèn chempui kan ak a, tui hlat deuhna neih kum phei chuan tuithãwl changél hnah khâwra chhin nèn kan ak far tluk tluk a. Kan pheikhawk bun phâk chinte lah chu \hèlret pheikhawk vár bel kái \up kha a nia. |hèlret pheikhawk tih takah a thler hma si a, kan han tihthler khán han \hui ve bawk \hìn mah ila, a peh lehzêl bawk si a. \hèlret vêka kan bel kha a ngai \hìn si a: tapchhakah kan \hu dawrh ang set sawt a, thir pan thler thlawr kha thukah kan rawh ling ver vawr a, a bel tâwk tùra \hèlret pheikhawk danga mi kan zai thlâk leh kan pheikhawk kha kan chuktuah ran ran a, kan thir rawh lin kha a kárah kan dah a, kan char hmui rum rum mai \hìn kha a nia! Kan pheikhawk khân bel a kái thluah mai a: Sipai nise lal tak tak tùr an tam mai!

In\henna Dár A Lo Ri

          In\henna Dár A Lo Ri

Ellis H.Pachuau

Genesis Bung Sawm leh pathum, cháng rukna kan chhiar chuan  ‘Tin, an awm dunna tûrin ramin  a daih ta lo va: an thil neih chu a nasa êm si a, chutichuan an awm dûn thei ta hlawl lo va’ tih ziak a ni. A Greek \awng emaw a Hebrai \awng tih vêl chhui ka tum hran lo va, a awmzia sawi chiam pawh ka tum hek lo: Mizo \awng hian a fiah êm êm si a! Chu lo rêngah ka sawi tum lam pawh a ni chiah lo.

Tunah zet chuan hman deuha ri rêt rêt kha, a lo ri ta rût a: Synod 2010 thurèl III. Pastoral 10. Pastor Bial thar hawn rawtna (Pastoral 3:10/2010-2012) chu keini lungrual taka Electric Veng Pastor Biala Kohhran pangate tán chuan in\henna dár kháwngtu a lo ni ta!  Treaty of Nanking avànga 1842 a\anga an lo awp tawh British-in June 30, 1997-a China kuta Hongkong an hlan tùrte pawh min hriat chhuahtîr rum rum mai.

Khatia Synod Inkhâwmpui meuhin a lo rèl tâk rupah khán  khaw lum laia a lum thu kan inhrilh kûr dup ang maiin rinnaa kan unau, kan rawngbâwlpuite chu kan inhrilh kûr dup kha a ni a. Rilru-in Ramthar lam a hawi a, Ramthar Veng leh Ramthar North Biak In leh Kohhran Hall zawng zawngte a mitthlà nghal chuai chuai a. Rilru hian rìn loh ramri a kham nghal a : Chu rin loh ramri chu 15.1.2011 (Inrinni)-ah fiah takin rìnin a lo awm dáwn ta a ni. Keini |halai Pawlte tán erawh zawng zanin  (9.1.2011) Farewell Meet kan neih tùr hi Dam takin mang\ha kan tih hun a lo ni ta reng mai le.

Zonunmawi - A sîr lehlam a\angin

          Zonunmawi - A sîr lehlam a\angin

-Ellis H.Pachuau

Zonunmawi kan ti chhen a, eng hi nge Zonunmawi chu ni ta ber le? Mi tam tak chuan Tlawmngaihna hi Zonunmawi hrilhfiahna-ah kan ngai niin a lang a, thusawitu tam tak pawh hian Zonunmawi tlawmngaihna tiin kan sawi zawm deuh zêl nghe nghe \hìn a ni. A dik lo hulhual chu a ni hauh lo. Heti záwng hian thlîr thung teh ang : Zonunmawi tih chu  Zo+nun+mawi tih thumal pathumin a siam a ni kan ti thei ang a. Zo tih hi noun a nih chuan Mizo tih laktàwi a ni a, Nun tih hi chu noun tho niin khawsak dàn, chet dàn, nunphung hman dàn,  nunna, awm dàn a kawk a. Mawi tih erawh chu adjective a ni ve thung a- nalh, duhawm, hmuhnawm tihna a lo ni leh a. Chutichuan Zonunmawi chu Mizo khawsak dàn, nun dàna a \ha leh mawi lai sawina a tih theih âwm e. Chu chu a ni tun laia chhawm nung tùra kan infuih mêk hi.

          Chuti chu a nih chuan tlawmngaihna hi chu sawifiah rual lohin awmze thûk tak nei a ni a, a mãwl thei ang bera kan sawi dáwn chuan ‘mahni indah\ha a, midangte dah pawimawh zâwkna,’ tiin kan sawi thei ang a; mahse hei hian a awmzia tak chu a phawk chhuak zo kher lo vang.

Thil man to leh Sorkar hnathawk hlawh

Sorkar hnathawk hlawh a sang an ti a. Sumdawngho pawh thil tito turin an inbuatsaih a, an inkau a, a cheng an hmet de de tan niin a lang. Mizoram kan vanduaina chu Central 6th Pay Commision Implement avangin sumdawngin thil man an ti to a, kan sorkar pachhiat vangin MNF Ministry lai khan Central pay anga kalpui thei dinhmuna kan din loh avangin Sorkar hnathawk thawi dam nan Pay change ( Scale of Pay changed to next higher scale: A tawi zawngin LDC-in UDC hlawh an la tihna) a ti leh a, chutah chuan Thil man a to thar a....tunah hian sumdawngin thil man an ti to a nih leh ngat chuan 'Mizote hi mi duham kan ni' tih hi ka pawm chiang tawh ngawt ang. Chuvang chuan, Sorkar lam hian essential commodities emaw thil dang pawh price a control a pawimawh khawp ang. Pay revision hi kum 10 dana thil man to etc avanga sorkarin a hnathawkte hlawh a siam hi...kan ramah chuan sorkar hnathawk hlawh a san veleh thil man a danglam thung a nihi hi! A leh a linga vut tui thlawr bel! Hei hian kan ram economy hi sorkar hnathawkte hlawhah a innghat tih a chiang in ti ve em le?http://www.facebook.com/#!/?ref=home

ZANTIANG TAWNMANG

“Zanin ka lungleng reng hi,

  Ka dawn vel eng vang nge ni? 

Chhawrhthlapui en vang em ni? 

A ni lo nunhlui liam hnu ngaih vang a ni.”

Chu zan chu, zan dang ang tho a ni. Bial K|P hruaituten kan Branch min rawn tlawh avangin inkhawm pangngai aiin a rei deuh a; inkhawm banah inkawm khawmna kan nei. Bial K|P kalphung leh Branch hrang hrang kalphung kan inzawt diat diat hlawm. Zan dar 10 : 00 a rik dawn ruai chuan kan \in thei hram a; mahni in lum lam panin \hen khat chuan zan hmasa lama FIFA World Cup 2010 Final inkhel an en chhuanlama mut hlan nghakhlel takin an in lam an pan a. Kei erawh chuan ka hna ngah zia leh mu hman ka nih lohzia ka hai hauh lo. Rilru hmanhmawh ru ang reng tak chuan chu hna chu ka pan a.

Ngaiteh, ka hna thawh tur chuan min lo hmuak a, zan dang ang bawk chuan ka mut pindan lam chu ka pan a. Ka inthlak fel hnu chuan ka khawl ka tinung a, ka tihnun rual ruala thawm lo nei ve ziah ka kel thlun pawh chuan a be dan ngai pata thawm rawn chhuah lehin a be al al a. Chu zawng ka hriat \hin pangngai a ni a; ngaiah ka nei hial tawh reng a ni. 

Chuan, ka hna pangngai chu ka chhunzawm char char a, engdang ka rilru-ah a lut lo, ka hnathawh bak chu. Ka mit tlin tawk ka thawk a, ngaiteh, Sana ka han en meuh chuan zan hmasaa World Cup an chawi lai vel tak a lo ni tawh a. |hing\hi-a Lalpa hnena kuna ka inhlan hnu chuan engmah ngaihtuahna hman ka nei lo; ka muhil zui nghal mai ni awm a ni.

Harh miah lo chuan min ko thawm hi ka hre ta a,  chuti chuan ka han meng a, chuan ka kiangah hian ka farnu hi a lo ding ran a. Ka mobile Sana ka han en nak chuan Zing dar 8 : 12 a lo ni der a! Ka farnu chuan tuk\huan ei turin min lo kaitho chu niin.

Book Review - VANGLAINI EDITORIAL COLLECTION

Ziaktu : K.Sapdanga
Chhuahtu         : Vanglaini
Chhuahna hmun : Charity Press, Aizawl Venglai Mizoram
Chhuah kum : 2004
Phek :
A man : Rs. 195/-

He lehkha bu ziaktu hi kum_____ a\anga chanchin bu enkawl lama hnuhma lo nei tawh, ______ a\anga vawiin thlenga VANGLAINI Ni tin chanchin bu-a Editor ni mek; Evangelical Weekly, The Revival-ah Editor a ni bawk a. He lehkha bu ziak tur hian a âwm veng vawng hle a ni.

Hetiang lehkhabu hi Mizorama a vawikhatna niin a hriat a; Mizoram Literature khawvelah mel lung pawimawh tak pakhat a ni. Kum 2001 chhunga VANGLAINI Ni tin chanchin bu chhuak Editorial dah khawm a ni a; 2001 chhung tih a ni nachungin, Jan 13 a\anga Dec_____ thleng a ni. A bu hmingah pawh VANGLAINI  Editorial Collection a nih ang hian thu hlawm khat fel taka tum neia ziak a ni hran lo va, a hun laia thil thleng mil zela ziak a ni a, thil chi hrang hrang ziahna a ni ber a. Bawm pakhata thil chi hrang hrang dah a, kan ngainat leh duhzawng / vei zawng deuhte kan dah thuah/ nawn hi a ang ber a. Fiction a ni lo va, Story a ni hek lova, Modern History huanga khung len theih chi a ni ang.

A bu chhung thu han chhiar hian kan ramdinhmun a chiang hlein a hriat a : Sorkar pawh policy nghet leh mumal nei lo, politician pawh ram \hatna leh an aiawhte ham\hatna ngaihtuah lem lo va mahni pumpui \anghma hai; loneitute / huan neitute vulh len lam aia an thlai thar hralhna pawhngaihsak lo sorkar; sorkar hnathawk chan tawka lungawi lo va nawrh hrat leh thil phut ngah tak kan nih thu a hriat theih a. Zirlaiin an hriatna tizau atan chhiar se la, politician-ten ram hruaina kawnga hma an sawn theih nan leh thlir dan dik an neih theih nan zir chiang se. Lehkha bu chhiar that chhe deuh pawhin thu hlawm hrang hrang a nih avangin a chhiar bek bek theih a ni.

No Tolerance Week Kan Hman Mêk hi

 No Tolerance Week Kan Hman Mêk hi

-Ellis H.Pachuau

Tun laiin Traffic Police lam chuan \an lain Traffic dan bawhchhia apiangte chu inngaihdamna nei lovin an chungthu an rêl nghal zêl niin ka lo hria a. Traffic Police-te chuan hemi hun chhûnga harsatna an tawh loh nán lirthei khaltute chu fimkhur tùr leh document leh license pawh fel thlap tùrin an chah a ni.

Hetiang hun hman a ngai ta hi a mak ka tiin, a lungchhiatthlâk hlein ka hria. Traffic Rules bawhchhia an lo hrem ngai lo nge ni? Ni dang / hun dangah khân an hmuh reng pawh an lo hrem ngai lo nge ni a, mahni insawifiah thiam thiam leh sawipuitu nei \ha kha an lo ngaidam zêl zâwk ni? A hrem chu an hrem ngei chuan ka hre si.

Tunah hian man tâwk pawh an \hahnem tawh fû niin a hriat a. Chhiah pawh an chhüng lût \euh tùrah lo ngai phawt ila. Traffic Rules bawhchhe tawh phawt chu hrem lohvin chhuah lo se la, Inngaihdam lohna kar nimai lovin  Inngaihdam lohna kumhlun ni reng se a \ha hlein ka hria. Dàn zam a awm chuan a lekkawhtu berin an lek kawh \hat loh chuan tuin nge lek kawh se kan tih le? Nge ni, hetiang kár khat daih lek hian Traffic Rules hi kan lo nei zâwk.

Zurui berh ve tak tak, MLTP Act an bawhchhiat avànga Lock-up-a zan riahtîr leh Central Jail hiala thawn an nih mêk laia a chethei zâwk, Lirthei nei zâwkte dàn bawhchhia kan lo ngaidam fo a nih chuan thil \ha ber a niin ka ring thei lo. Dàn chu dàn a nih angin a kal mai tùr a ni dáwn lo’m ni?

Kan ram khawpui ber kawngpui hi diak leh tui luang a la tam êm êm mai a; chutih rual chuan mipui kalna tùr bîk a la tam lo bawk nên. Furpui laiin kawngpuiah mahni thuamhnaw neih \hat ber leh fai bera kan inthuam a, balh hlau ngawih ngawiha kan kal dêm dêm laia Motor chak tâwka rawn tlãnin min han chil per puat puat a, min han tlan pel leh daih \hìnte hi man theih dàn tùr Rules-te hi awm nghe nghe se ka ti asin!

Lirthei khalhtu lam pawh kan fimkhur a, kan hawihawm zual deuh deuh pawh a hun tawh a ni. Lirthei khalhtu \henkhat, kekawr bul leh tawnzau nena inthuam, chapal bun, kesir nõ lo ve tak taka an awm ringawt mai hi chu kan inenfiahna tùr a niin ka hria. Silchar Reckshaw pû niawm tak tak pawh kan awm nuk mai a, \hing, bal, khãk zet maia lirthei han khalh ngawt hi chu Public Service tán phei chuan a mawi lo êm êm a ni.

A khar nán - Traffic Rules pawh hi puanzar tam ni se. Lirthei khalhtute pawhin chu Rules chu hre bel êm êm se la; rui lo hai lovin kan Police-te paw’n dan chu lekkawh se a \hain ka ring. 

- Ellis H.Pachuau

Aizawl Venglai

(14.09.2004)

(He thuziak hi Ni 17.09.2004-ah VANGLAINI Daily News Paper- Chhiartute Huangah tih chhuah a ni)

A MAK A NÂ !

 A MAK A NÂ !

-Ellis H.Pachuau

Famkim lo khawvêla chêng mêk hring fâte hian Siamtu'n a rel dàna lungawi zo lo ang hrimin suangtuahna hlimthlâ, a tàk ram hmuh mai theih si loh hianin kan nunah bu a khuar a, a la chenchilh zui bawk a.Ta se, ta lo se ti reng reng hian kan hmanhlel a. Kan awm dàn hi kan duhkhawp tâwk lo nge ni ?  Amah kan pi Evi rinna chak loh lai, a chauh lai leh mawina ît a, amah ngei siamtu din dànah pawh lungawi tâwk lovin Siamtu an a duhna rilru chu kan la chhawm nung zêl pawh a ni mahna. Kan pi  a ni miau va !! 

Hring fâte hi zawng ze inang lo tak tak hi kan ni nuk a : A \hente chuan thil rêng rêng hi a thim zawng hlirin kan thlîr a. Mi dang lehte chuan an thil tawn chu a hrehawm emaw, a harsain an tán a buaithlâk viau emaw a hlimawm lam a ni emaw an tawn apiangah an chungah eng pawh lo thleng se a êng zawng hlirin an thlîr hram hram \hîn a. Chû'ng mite thlir dàn chu thlir dàn duhawm tak a ni a; an vannei bîk a ni. Mi tam tak chuan an thil tawn apiangah ' Lâwm zêl ta'ng e ' tih hla ring taka an sak theih mêk zêl laiin, a \hente erawh chu mahni chantâwka lungawi lo rêng rêngin ' Ka chantâwkah ka lungawi lo ' tih hla aw pawh tichhuak \ha peih mang lovin kan sa nawn riai riai mai zawng a nih hi maw. Mahni chantâwka lungawi ngai rêng rêng lote hi mi vanduai tâwpkhâwk chu an ni mai lo maw ?

Amah kan pi Evi bawk khan lo bawhchhe ta lo se la chuan lungawi lohna kan  neih pawh hi awm lo tak maw ? Lei mihringten ânchhia kan dawn, khawvêl thlir dàna kan thlir a, chhiatna tàwpkhâwk- 'Thihna' avànga lungngaihna tuartute pawh hian Siamtu rorelna a nih zia hriatthiam a har a nih hi. Puh-mawh tùr apui kan zawng a, kan taimâk vàng pawh ni lèm chuang lovin, kan ngaihtuahna kan vah kualtîr vêl a. ' Ni berin a lang' tih mai mai kan chaw tak khûkpui luai luai mai a nih hi. Motor Accident-a thi an awm chângin : a motor \hat loh vàng te, a khalhtu tihsualte leh eng engemaw kan puh kual vêl a- 'ta se, ta lo se' ti rêng rêngin thihna pumpelh a nih theih dàn tùr mawlh kan ngaihtuah a; a sawt tawh chuang der si lo.

Natna khirh tak veite an thih châng lahin : ' A natna chu lo hre chhuak hma ni ila chuan kan inchhan hman tùr a ni a; mahse kan hriatchhuah meuh chuan kan tlai lutuk tawh a, kan inchhan hman ta lo a ni' tiin kan rin thu kan la sawi \al'h a. 'Ila chuan' tihte leh 'ta se' tih hi chu chhûlkhat kual an ni a, sawi hran \al'h pawh tum ila, a harsa hle chuan ka ring.

Conference kal ve thu

 Conference kal ve thu

-Ellis H.Pachuau

“Kha, mitdel chem vaiin kan pik ve a ni e, a fahrah viau mai thei,” tiin Ruata Zadeng chuan a article chungchánga a insit thu Phuaibuang-ho tih dàn takin a bekdawm (mobile) hmangin min rawn hrilh a. VENGLAI Chanchin bu (2008)-a article of the year-a ka lo hual a ni a; a rawn thlawh chhuak ropui nameuh mai le. ‘Venglai Dara’ tih mai pawh a phû hliah hliahin ka hria!

Khatia, a duh lam hawi záwng záwnga a kam \huahna a pik tâk puat puatah chuan, kei, Záwngin khaw tui liak meuh pawh min pik khum ta bawrh bawrh kha a ni a! Lo Sepui ruah tuar ve tlawk tlawk rîkngawt chu kei sipai rilru lo chhuak ta hian a thei lo a ni ber mai a. Ka han chhim thal bekang puah ve phawng phawng ang a, ár chuk tui lo khawp chuan kan inchhuah êm lo vang chu.

Ruata Zadeng angin tlangval hnu-a K|P Gen. Conf. kal nawm thu sawi kur dup tùr ka hre ve hran lo va, pawn thuah tel meuha vawi khat ka chhuahna ve chu thuziak hmanga han umzui hrãm chu ka duh ve bawk si a; Tu emaw anga 90’s chho bawr vela senior lam in\an tawh hnu-a Conf. lo kal daih tawh ka ni lo bawk nèn. Vawi khat kal naa vawi khat tawnhriat, mita hmuh leh benga hriatte chu thlasik mau puahpui phawng phawng ila a ni mai alãwm ka ti ta deuh.

Kan pik-pak teh ang

 Kan pik-pak teh ang

-Ellis H.Pachuau

Hmânah kha chuan lehkhathawn hi kan ziak vak vak \hìn a, \hian a ni emaw, chhungte lehkhathawn a ni emaw, a...zêp nâk emaw hmangaihte lehkhathawn pawh a ni e, chumi piah lamah Sikul kan kal lai chuan chawlh dilna pawh a ni bawk. Thawn chhuak hnem nà nâ na chuan a dawn pawh kan dawng hnem narawh e.

Kan lehkhathawn dawnte chu inhlut hleih tak pawh an ni hlawm! A \hente chuan thingrem mawng an chang a, chhûngten an hâi thulh pawha an hmuh mai theih loh tùrin kan han thukru a! A \hente chu dah\hat chu sawi loh, kan nuai hlawm nawk nawk a, kawmchárah kan vawm chhuak nawl nawl mai \hìn kha a ni a. 

Lehkhapuan pawh a inang lo nuaih a, a \hen chu rûlrin hmanga ziahte a ni a, a \hen chu naupang exercise book pawh thlâk tih hriat reng rengte kha kan han dawng \hìn kha a nia. A lehkhapuan \hat leh \hat loh lam kan ngaihtuah lo va, a thu lam kha a ni zâwk kan ngaihtuah chu.

Ka lo tar ve tawh rêng em ni?! (Chawngkhum dàn tláng huat loh)

Ka lo tar ve tawh rêng em ni?! (Chawngkhum dàn tláng huat loh)

-Ellis H.Pachuau

Miten, “Nupui nei tawh rawh,” an ti ve ta chhen mai! Engmah lah chu an hre der si lo va. VENGLAI  Editor Butru zet pawh hian tar min han tih ve tawh chu! Tar hi engtianga teh chi nge ni a, kum upat lamah nge kan teh dawn a, ngaihtuahna upat lamah nge, intihupat chawp lamah ni zâwk ang? tihte min ngaihtuahtîr lo thei lo. ‘Tar’ tih hrim hrim hi Oxford Dictionary pawh han zawt kual vel ila, ‘tar1’ chu kan hriat thiam zawngin alkatara tih bâkin min hrilh lo va, ‘tar2’ pawh chu  lo awm ta tehreng pawh ni se, lawngpû tena an thil zàr \hin ‘tarpauline’ lamtawi bak min han hrilh leh tùr chuang a hre hlei law. Encyclopaedia Britannica lamah pawh han zawt pawh ni ila, chuti tho chu. Kan tar sawi chu a lo hre ve aw kawng lo mai. Chu lam lo zawnga zawh chi chu a ni a, anmahni \awnga lo zawh zâwk tùr a ni. Chutianga zawh chuan a hre nameuh mai le! Thil hi a ni lam zawng chuan a kal purh a, a ni lo lam zawng erawh chuan a sak \âk \hìn rêng a ni.

Bial K|P Rencontrez Semestriel

June 26 & 27,2010 chhûnga Electric Veng Pastor Bial, Bial K|P kum Chanve Intawhkhâwm kha i han thlîrlet dáwn teh ang. A che che sih hlawkah, a nui nui banah! |awngdang ka han zep nuai’h a : African \awnga kum chanve intawh khâwm tihna mai a ni e.

Zan khatna, inkhâwm vawi khatna  chu : Reports inkhâwm a nih avàngin kum chanve chhûnga Branch 5 leh Pastor Biala Bial lian ber reports chu a rei lo thei lo.|an dár rik a\anga  dárkár 1 leh a chanve minit 1-a a pelh hnuin Hla hnuhnung kan sa \an thei hrãm. Reports pawh a sei záwng pawh a inang tawh viau mai. Sawi hrãm ka duh chu Budget tih hi Batjet tia lam lovin Bajet tia lam a dik zâwkin ka lo hre ve \hìn.

|ah hla kan thlâk

Kan ram hian eng a ti zõ ta nge? Heti êm êma ruihhlo avànga a dam tâk loh le?

        “A tûr a nâ e, zungzâm a fan zõ,
Râwlthar dâwntuaite a dàwi ã mêk e;
Nángma tán a pawi lua, i dáwn chiang lo a ni,
Aw, Mizo tlangval, famkhua i lawi dáwn e,
Sim rawh, bansan la, Ruihhlo hi hmêlma a ni,
Aw \ang fan fan.”
-Lalsangzuali Sailo

Eng tik a\angin nge?

Kum 20 kal ta vêlah khán kan \henawm State-a Mizo hnahthlâkte chuan an fâten drugs ti lovin zû in \hìn zâwk se an tih ngawih ngawih \hìn thu an sawi kan la theihnghilh hman âwm lo ve. Khatiang hun kha tawng ve tùrah kan lo inngai lo va; nimahsela, a zual zawpui vailenhlo tih chu nêp tê a ni ringawt. 1984 vêl a\ang khán drugs (heroin) thihpui kan awm \an a, a hmangtute pawh mi hausa fâte niin, heroin hman lar ber a ni \hìn. Hun a kal zêl a, heroin mai bâkah proxyvon ruih nachang hriat a ni ve leh zêl a; 1990-ah chuan proxyvon hman sual avànga thi an awm ta hial mai! Ruihhlo ngaitute pawh mi hausa fâte chang ni tawh lovin mi hnuaihnung zâwk fâte nèn lam kan rui ta zêl zawng a nih hi. 1990-2002 bâwr chho-ah chuan kan \halai tam takte chu ruihhlo bâwihah an táng a, \halaite tán ruihhlo vànga a thim chhah lai ber a ni hial âwm e.