CFL Hmingthanga Nghilh Loh Nan (|henlohna ram nuama intawng leh turin, Thlafam vangkhuaah min lawi san ta)

CFL Hmingthanga Nghilh Loh Nan

(|henlohna ram nuama intawng leh turin, Thlafam vangkhuaah min lawi san ta)

-Ellis H.Pachuau

Kum 1992 a ni a, kan khua atanga km 9 leka hnai Suangpuilawn H/S-ah Pawl 10 ka zir lai a ni a. Keini lah inti tlangval ve \an, a lang a pauva chhungte hriatpuia ngaihzawng la nei ngam lo, ngaihzawng erawh nei ve tawh si kha kan ni a,  kan lehkha zir chawlh lai hian zan dar 9:30-a Lunglen hun kha All India Radio-ah kan herh chhuak a, chutih lai chuan-
FM :Chun leh zua run in chhungah biahthu hrilh a rem si lo
Zantiang Chhawrthla eng hnuaiah duhten aw ka lo nghak che

 M: Aw ka di nang ngaih vang hian i liamna lamtluang chhuiin
Hmangaih ber ka tawng ta che chhawrhthlapui eng hnuaiah

Aw ka di i tel lo chuan e
Chhunni leh zan khua ka hmang liam thei si lo
Kan chhuahtlang hmun hlui lamtluang ngeiah hian e
|hen loh biahthudi hril dun leh ang aw.


FM: Chun leh zua \huam ang ka do hmangaih luat vang che hian e
Ka taksa leh nunna pawh i tan chauh ka rawn hlan a
M: Nangmah iang hian e ka  di ka nun zawng zawng ka hlan che
Ka thisen zungzam nen lam biahthudi an hlan che

FM: Fanau maltluan chawi tura runhmun kan len hun chuan
I tan chunnu rinawm ber nih ka tum zel nang e
Hun leh ni her liam zel hian liampui lo se hmangaihna
Chutin nangnen runhmuna kan lendun ve nan

tih hi a rawn ri ta hlerh hlerh mai a. Chu chu ka vawi khat hriatna. Khatih lai kha chuan AIR artiste lar leh an hla sak kha chu ka hre deuh \euh kha a ni a, ka aw hriat ngai a ni lo va; mahse ka beng a verh hle. Tu nge ni ang aw...tiin thinlungah chuan zawhna a inthumrawn nghal tluk tluk a, a zai zawhah chuan Announcer chuan a hla hming leh a satu a han puang a : CFL HMINGTHANGA- Chhuahtlang Hmunhlui tih a ni. Chuta \ang chuan ka theihnghilh leh ta lo. A hnu-ah chuan AIR lamah Lengzem zai tihchhuah hun leh lunglen chu kan chang a, vawi 2 ka ngaihthlak hnu-ah a hla hi ka hre chhuak nghal vek nghe nghe a ni.
   Chuan, ka lehkhabu tur ka edit mek laiin Facebook lamah notification a rawn ri tleng a, ka han en nak chuan Khawbung lam chanchin ka hriatna ber TBC Lalrohlua of Khawbung chuan tihian min lo text a: ‘Mizo Lengzem hla tha tak tak min hnutchhiahin CFLa chu kan khaw damdawiin ah a boral tun mai khan’ aran ti ta... min \awng khawp mai a. ‘awwww ka van ui em em awwwww......   eng nain nge...a thih darkar min lo hrilh thei em?’ tiin ka thawn let nghal a.... ‘TB natna chu an tia lawm....’ tiin min chhang  a ‘okkk’ tiin ka chhan zet hnu-ah ‘Samthangah a mi an vui ang’ tiin ka zawt zui leh a... ‘aw ni ang,,kuang kan siam zawh ah pjhurh chhoh a ni ang’’’ tiin min chhang leh a. A thih darkar ka zawhna chu min chhan hmain Amah pa \uan\ha Pu K.Lalrinpuia of Lunglei MJA chuan Chhiatni \hatni Group-ah ‘Zaithiam CFL Hmingthanga chu zanin 9.9.2012 Dar 10:25 khan Khawbung PHC ah a TB natna avangin a thi’ tih hi a rawn post nghal a. Ka hna ka dah nghal hmak a. |hianpa hlua chu ‘w......a poi mang e...ka van ui em...... kuang mawi tak kha lo siamsak mawlh teh u’ tih text ka thawn zui leh hram a.  Facebook-a ka wall-ah a thih thu pawh ka post ta nghal a. Chu chu a ni  a hun hnuhnung ka hriat dan thung chu.
Tun thleng hian Leather Jacket leh Jeans jacket ka hmuh hi chuan CFL-a hi ka hre chhuak ziah \hin a, hetia min lo thihsan takah phei chuan ka hre chhuak leh nasa awm mang e aw ka ti.
Kan intih tlangval ve \antirh a\anga tun thleng hian CFL-a zai hi chu ka ngaihthlak nasat a ni \hin. Mikhuaah Sikul kan han kal a, tu tu emaw kan han ngai em em \hin kha a nia, khual khuaah Sikul min kalsan daih phei kha chuan tu tu emaw kha chu an ngaihawm \hin teh a nia, he hla hi kan ngaithla tlut tlut mai \hin kha a nia:

KA DI TAWN HUN TUR
Suihlunglen changin in vangkhua thlir a,
Ka chhingmit lenin ka hawi ruai ruai a
Sakhmel hlimtea bahsam leng siauin
Phai khawpui mawiah i tualchai tur chu

Thunawn:
Chhunni her liam la, kumpuisul vei rawh
Hun leh ni chhiara ka di tawn hun tur
herchhuak thuai thuai se
Ka suihlung dumtu ka tawng leh mah

Hmangaih ber d te, in vangkhua pelin
Kan run in chhungah riahrun rem ve la,
Sakruang in pawm a, suihlungrual tein
Sakhmel vul laini i hmang chul dun ang

Sikul run bela pheilai vawr siauvin
Chhunni hlimtein i hmang bik em ni
Kei sirah hnawl a, \haval dang tawnah
Min liamsan chuan maw ka tuar zo lo’ng e

Chhuahtlang lamtluanga biahthu hril turin
Suihlung rual tea pheilai vawr dunin
Ka nghilh tawh ngai lo’ng ka hring dam chhungin
Nang ngaih suihlunglen ban ni awm ang maw?

A hla pakhat L.D. hmel\ha tih hla hi belhchian a dawl hlein ka hria a. Mizo \awng a thiamzia pawh a lang thei. Han belhchian chuan a lungchhiatthlak hlein ka hria. Thihna chu sawi loha lum nise chumi bakah chuan retheih avanga keini aia hausa min han ngaihzawn san ngat tluka na hi mipa tan chuan a awm loin ka hria. Chu chu thiam takin heti hian a han ti a-
“Kan runah nuthai chan min tiam a,
Kan silh leh fen ang fen min tiam a;
Lianchhung annem ka phu loh val i tawn vanga,
Suihlung min hersan hi tuar a har na ka ti”
 a han ti thiamte hi a fakawm hlein ka hria a. An nun hluiite a han chhuikir a, mite pawhin an nun hlui, an inzui tawh dante hriatpui nia nemnghetin, lungrual leh hlim taka an len dun laia an thlalak hluite a han thlir a, a rilru na lutuk chuan heti hian a han ti zui leh bawk a-
“ Hmangaihna chhingmit del vang em ni?
An hai lo leng zawng ten kan nunhlui,
Kan hlimthlaa suihlung kan rual lai ka thlirin;
Ka tuar zo dawn nemmaw luah loh LD hmel\ha”

LD HMEL|HA

1.Kan hlimlaini a liam mai tur hi,
Ka phallo aw ka di nang ngaihlai;
Eng biahthu hriain nge maw suihlung i her tak?
Aw ka ngai em a che luahloh LD hmeltha.

*I mawi chuang bik asin i lenrual zingah hian,
Furkhaw thiang chhawrthla eng i iang e;
Ngaihnobei chuang hmangaih par ka thliahpui silo,
Aw ka ngai em a che luahloh LD hmeltha*

2.Kan runah nuthai chan min tiam a,
Kan silh leh fen ang fen min tiam a;
Lianchhung annem ka phu loh val i tawn vanga,
Suihlung min hersan hi tuar a har na ka ti.

3.Hmangaihna chhingmit del vang emni?
An hai lo leng zawng ten kan nunhlui,
Kan hlimthlaa suihlung kan rual lai ka thlirin;
Ka tuar zo dawn nemmaw luah loh LD hmeltha.

A hla pakhat ZONUNMAWI tih hi ka duh tawp hlei thei lo chu a ni: He hla hian Pipute rawn \awngtirin zonunmawi tlawmngaihna vawng zel tura min chah thuin bul a han \an a. Ramchhan vanga nun pek huam, rethei ngaihsak hnam, tlang hrang hrangah cheng mah ila, kan chhuahna chu bul hmun khat kan ni tiin a sawi te te a, tunah erawh chuan rinawmna leh dikna te a lo tlahniam a, hnamdang nun zia kan chawisang zel a, kan zonunmawi kan hnawl mai dawn em ni? tiin \hangtharte hi min cho zui a ni. A thunawnah hian ‘Sappui doral tuiang lo lian mah se, Zonunparah ngei vul dun rial rial ang aw’ tiin min sawm lawm lawm a ni. He hla hi AIR-a Hla Duh zawng thlan hun programme-ah thlan ka tum a, mahse a record tel lo hlauh a, ka ui ngei mai.
ZONUNMAWI
1. Aw a mawi chuang ngei e, aw kan zoram nuam hi,
Ka hril seng lo che aw zai leh lamin;
Pipu mihrang dairial chang tawh hnuten
Biahthu an rawn hlan e \hang leh tharte;
Vawng zel r’u aw zonunmawi tlawmngaihna min ti.

Zonunmawi par ang lo vul zel ang che,
Thanlai bang loten a rinawmna vawng zelin;
Sappui doral tuiang lo lian mahse,
Zonunparah ngei vul dun rial rial ang aw.

2. Ram chhan vanga nun pe huam kan ni ngai e,
Kan hmaih\helh ngai love riangvai chanhai;
Unauza kan ni e nang leh kei hi,
Lenna tlang leh mualte lo dang mah se;
Chhuahna chhinlung zofaah kan dang chuang si lo.

3. Mahse maw hnamdang nun zia kan chawisang zel,
Kan zonunmawi kan hnawl mai dawn em ni?
Rinawmna leh dikna par an chuai;
Thlangkawrvai lianten min chimbuai mah se,
Nghilhni ka nei lo’ng che zonunmawi kumtluangin

A hla pakhat ‘Thangnuihiauvi’ tih hlate hi ka va’n ngaithla hnem tehreng em aw...nu leh pate duhpui loh, rem loh zawng tak mai ngaihzawng han neih mauh mai chuan he hla hi duh loh theih pawh a ni lo! Hmangaihna hi a \hente chuan damchhung hlim nan an hmang a, \henkhatte erawh hi chuan lungngaih nan kan hmang a nih hi maw...chu chu thiam takin chang thumnaah a han phuah a.

THANGNUIHIAUVI
Thinlai dam ni reng hi ka nei dawn lo
Chun leh zua vanga nang ka \hen tur che
Hmangaihna a dai chuang si lo kan karah hian
I tuar dun zel ang aw hmangaih Thangnuihiauvi

I chun leh zua vangin khawiah pawh liam mah la,
tawp lova nang hmangaihtu che hian
Ka rawn zui zel ang che i \ang bel turin
Malin min awmtir suh Hmangaih thangnuihiauvi

Lanu val kan chan hma a\ang reng khan
Tu dang ngailotein kan leng dun a
Hmangaihna awmzia kan hriat dun rual rualin
Sam ang \hen dar lo ri tuar a har kan tawnah.

Khuanu tuah rem lo tur em kan lo nih le?
Damchhung hlimnaa an hman hmangaihna hi
Keini zawng lungngaihna min thlentu mai maw lo ni
Rauthlaleng chan thlengin ka tuar zo lo’ng e

A hla pakhat Ngaihlai Masang’ tih chuan Zoram a deng chhuak hneh hle a. Tape recorder nei zawng zawngin an play ta vek emaw tih turin khaw tinah hian a zai chuah chuah mai a ni. A music hi a ri at a, a thluk pawh tho \ha tak siin Mizo rilrem zawng tak, thu hriat nuam bawk si a ni a, hlarua pawh a hmang\ha hlein ka hria.

NGAIHLAI MASANG
Aw d suihlungruala kan lenlaini zawng kha
Khuarei an chang zo ta hlimni par ang an chuai
Hmangaih biahthudi min hlan zawngte
Ka vawng reng \hin thinlairukah

Mahse keizawng ka tuar thiam lo
Ngaihlai Masang i tel lo chuan
Awmkhua harin thinlai a hnim riai riai
Engdang ka dawn thei lo nang vangin
Ngaihlai Masang ka ngai ber che

Nunhlui zamual liam hnu ka dawnkir chang ni hian
Minthlaan i cham e i sakhmel hlim thla hi
Buan ang pawmin aw min hlan leh la
Anka nemten i hmangaihna

Lenrual zaleng zingah hlimni awm \hin mah se
Ka thinlai lungrukah nang ngaih ka bang chuang lo
Zaleng zawngten min sel bik mah se
Suihlung rualten i leng dun ang.

MIN KALSAN SUH tih hlate hi ka ngaithla zing \hin khawp mai bawk a, ‘Nang vang hian e zaleng dangte pawh i ta ka nih thu hi hrilhin Sirah hnawlin nang ka thlang \hin che’ a han tite hi a sawi mawl thiam ka ti.
MIN KALSAN SUH
Ka hlim ni leh lawmlai ni pawha ka theihnghilh ngai lo Mampui
Sakhmel tawn loh ni a rei mang e
Hlimten khua hmunah kan len hun chuan
Tawn loh kar lunglen i hril dun ang aw

Hmangaihna ka sawi thiam lo ve aw
I tel lo chuan hlim zai reng hi maw ka rel thei mawlh lo ve
Ka \huva nunnem min kalsan suh
Khawngaihin e ka kiangah awm reng rawh

Nang vang hian e zaleng dangte pawh i ta ka nih thu hi hrilhin
Sirah hnawlin nang ka thlang \hin che
Kei aia hmangaih zawk dang i neih chuan
Khawvelah damchhan tur dang ka nei lo

Tlin lohna zawng zawngte inngaidam tawna Felnaa inruat tawn zawkin
Hmangaihna chauh hi kan karah ding reng se
Lei damchhung ni chhiar dun zel turin
Hmangaihna chauh hi i vawng zel ang aw

‘Intawng leh ngei ang aw’ tih hla pawh hian Zoram a dengchhuak hneh viau mai a. He hla inchhawn pawh hian belhchian a dawl viau chuan ka hria a. Mizoramah hi chuan inkhawmpui neuh neuh a tam a, chumi a\ang chu mi tam tak hi an inngaihzawn phah reng a. Kar pawh awm mumal lova lo inhmangaih ta maite awm ve chawk a ni reng a. Chutiang dinhmuna dingte chungchang phuahna hla chu a ni a, hetiang mite tan hi chuan a \ha thlawt a ni.

INTAWNG LEH NGEI ANG AW
FM: Kan vangkhawpui bela chhingkhual i rawn chanlai khan e
Kar pawh awm hman lovin ka lo hmangaih reng che a maw
Mahse \uan\ul vang hian min liamsan leh ta si
Kan intawng leh ang tih tal min tiam rawh
M: Tuar i har dawn ngei ka di i sakhmelmawi ka thlirin
Hmangaihna chhingmit ngeia min thlir vang hian
Ka tiam nang che rinawmin lo awm reng la
Duhluat vangin lam ang ka lo let leh ngei ang

Ka tuar nem thei dawn lo sam ang kan in\hen chuan
Sakhmelmawi leh ka di lalnunnemte aw
Kumpuisul vei hma hian intawng leh ngei ang aw
Thlafam chan hma loh chuan e ka \angah bei hle hle

FM: Hmangaih dang nei reng chung chuan biahthudi min hlan lo la
Ka thianghlimna parmawi thliaka min liamsan leh si chuan
Riakmaw ianga vaiin dairial ka chang ngei ang
Ka dawn sei ngam lo aw ka chan tur hi
M: Siktui luankir hma loh chuan rinawmin awm reng nang e
Ka nunna chhalin ka tiam nawn leh nang che
Ka hmangaih che duhlai di enchim loh
Min hriatpui turin Khuanu ka thlang nang e

FM: Suihlung muangten hmangaihnain ka lo nghak reng ang che
Kumtluang i thai ka chan thlengin ka hmangaih reng ang che
M: Suihlung muangten zanmu lo chhing tawh la
Kan tiamthu di zawng kha i vawng dun zel ang aw

A hla dang dang Hmangaih CFL tih te, Nangnen kan hlimlaini tih te, Ka nau vala tihte, Phuloh dawn thar tih te, ka hmangaih ber i ni tih te , Zawlaidi tih te, Khuavang chhinchhiah tihte, Lenghermawii tih te, Ngaihlai vulmawite tih te, Chhan let loh hmangaihna tih te, Lalnu lungmawltih te, Tawnthar Di tih te, Mitthla a lang hlimthla tih te, Ka lo kir leh tih te, Rauthla ditih te, |hen che ka hlau ber maitih te, |hen lohna ram tih te, D Enchim loh tih te, Valtinlawri tih te pawh hla mawi tak tak, ngaihthlak hlawh tak takte an ni hlawm.

Kei ka tan CFL-a hi a hlu zual em em a, a hla ka ngaihthlak tam em avang hian ka ui takzet a ni. Hetia min lo thihsan takah hian an khaw thleng te ka mitthla-ah a lo lang uaih uaih. Hla thar nei rih lo mah se la a hla phuah leh sak tawhte a thiamin a hlut em vangin hian min dampui reng se kn ti a ni. Mahse kan duhna te, kan ngaihna te, kan uina te chuan a dang zo si lo va. Ama hla pakhatah pawh
“Hmangaihna vang chuan chun leh zua hrang leh
Hmelma zawngte chu kan tuar chhuak a
Mahse awmlai lian lo hrang meuh zawng e
Hmangaih vang pawhin kan dang zo lo”
a lo ti a, amah hmangaihtu, uitu zawng zawngte duhna chuan a uibet zo ta ngang si lo va, thihna meuh zawng kan dang zo ngang lo a ni e.

         Lo lawm ang che ka Lalnunnem
CFL-a fam rauthlaleng chu,
Chatuan ram mawi nuama cheng ve turin 
Ka Lalnunnem lo hruai ang che