Khawtláng hmangaih rilru puin aw

-Ellis H.Pachuau

Kum a lo thar a, kum 2024 chu kan lo chuangkai ta reng mai a. Tun \umah hian páwl hruaitu nih chungcháng sawi kan tum dáwn a ni. Khawtlánga páwl hrang hrangah hruaitu thar kan awm vek a. Kum hluia kan chanvo chelh ngãi chiah kan chelh a nih pawhin hruaitu thar kan ni tih inhriain bul kan \an tùr a ni ang chu.

Kumhluia chanvo ka chelh hrang hrangte a hming maia chelh ka nih chuan he kum thar hian rilru min siam thar sela. Nihna kan neih hian ngãia neih hi a hlauhawm ber a, ngãia kan neih tawh chuan insiam\hat kan ngai tawh tihna a ni.

Páwl hruaitu kan nih hian a hminga ropuina leh mawina ringawt a keng lo va, páwl zawng zawng aiawh kan ni tih hriat tlat tùr a ni. Páwl hruaitu kan nih chuan kan nihnain a ken tel hmahruaitu, tihmasatu, hnung khartu, ngaihtuahna séng nasa biktu, tha thawh nasa bîktu nih a keng tel tih hriat tùr a ni. Chutiang mi kan nih loh chuan hruaitu tlâk kan ni lo tihna a ni ang. Hruaitu ber a hnungah emaw mi ruala a kal vaih chuan hruaitu a ni lo tihna a ni ang. Lehkhachaih angin tehkhin ta ila, hruaitu dinhmun chu a chaihtu a ni ang a, lehkhachaih zâwk a nih chuan thlawh ngaihna a awm lovang.

Páwl hruaitu hrang hrang inthlannaah chu mite chhûng chhûng / chumi kual tih vêl, line-up tih vel thuthang a awm leh \hìn. Inthlan boruak a dik loh chuan páwlin a nih tùr ang a ni zui thei \hìn lo. Hei hi kan tih reh loh chuan khawte inlungrual lo, hmasâwn thei lo kan ni mai ang. 

Kan khua pawhin hma kan sâwn chho ve mêk a. Khawtlánga sum lût pawh hmân leh tûn chu inthlau tak a ni. Khawtláng hmasâwnna tùr kan ngaihtuah chângin daih rei, hman tlâk chhawr nahawm tùr kan ngaihtuah thiam a \ha ang. Kan chhûngkua emaw kan laichin hnãite tána ham\hatna awm thei melh rana ruahmannate kan siam a, páwl kan hruai a nih ngãi chuan páwl hruaitu tlâk kan ni lo tihna a ni ang. 

Sawrkar scheme / project tihhlawhtlin nána hna kan hmu / thawk a nih pawhin keimahni hlâwkna ûm avànga hna chhia hi awm lo se la, pawisa /fund hmuh a harzia hre chungin kan thawh apiang kha ât laia siam ang maia tlo leh nghet tlet tlawt, a \ha thei ang bera siam/thawh kan tum tùr a ni ang. 

Khawtlánga hna awm, khaw páwn lam miin an rawn thawhah pawh hna vil kawngah pawh, khawtlánga páwl hruaitu hrang hrangte pawh tho thil ang \hata inlungrualin, khawii lai kila sum emaw therhlo danga vawmhlum mai mai theih hruaitu kan awm tùr a ni lovang. Chutiang kan awm a, hna a chhia a nih vaih chuan, khawtláng hmélma an ni ang a, khawtlángin kan kawh rawn luih luih tùr a ni ang.

Kan khua hi kan khua a ni reng dáwn - A chhûnga awmten in hmangaih loh chuan a chhûnga awmte bâkin dem in hlawh lovang. Kan tih apiang ‘Isua nise engtin nge a tih ang?’ tih inzâwt ila, a dawt chu khawtláng hmangaih rilru puin aw.