In\henna Dár A Lo Ri

          In\henna Dár A Lo Ri

Ellis H.Pachuau

Genesis Bung Sawm leh pathum, cháng rukna kan chhiar chuan  ‘Tin, an awm dunna tûrin ramin  a daih ta lo va: an thil neih chu a nasa êm si a, chutichuan an awm dûn thei ta hlawl lo va’ tih ziak a ni. A Greek \awng emaw a Hebrai \awng tih vêl chhui ka tum hran lo va, a awmzia sawi chiam pawh ka tum hek lo: Mizo \awng hian a fiah êm êm si a! Chu lo rêngah ka sawi tum lam pawh a ni chiah lo.

Tunah zet chuan hman deuha ri rêt rêt kha, a lo ri ta rût a: Synod 2010 thurèl III. Pastoral 10. Pastor Bial thar hawn rawtna (Pastoral 3:10/2010-2012) chu keini lungrual taka Electric Veng Pastor Biala Kohhran pangate tán chuan in\henna dár kháwngtu a lo ni ta!  Treaty of Nanking avànga 1842 a\anga an lo awp tawh British-in June 30, 1997-a China kuta Hongkong an hlan tùrte pawh min hriat chhuahtîr rum rum mai.

Khatia Synod Inkhâwmpui meuhin a lo rèl tâk rupah khán  khaw lum laia a lum thu kan inhrilh kûr dup ang maiin rinnaa kan unau, kan rawngbâwlpuite chu kan inhrilh kûr dup kha a ni a. Rilru-in Ramthar lam a hawi a, Ramthar Veng leh Ramthar North Biak In leh Kohhran Hall zawng zawngte a mitthlà nghal chuai chuai a. Rilru hian rìn loh ramri a kham nghal a : Chu rin loh ramri chu 15.1.2011 (Inrinni)-ah fiah takin rìnin a lo awm dáwn ta a ni. Keini |halai Pawlte tán erawh zawng zanin  (9.1.2011) Farewell Meet kan neih tùr hi Dam takin mang\ha kan tih hun a lo ni ta reng mai le.

Lungrual taka Conference, Sports, Kum Chanve Intawh khâwm, Advance Krismas (Musical Meet) kan neih ho kha nun hlui a lo chang dáwn ta a, ngaiin àu mah ila Kir zái rêng an rél  lo vang. Bial Advance Krismas-ah Ramthar Veng Branch mei lum chhèm kan ái pha tawh dáwn lo va, Ramthar North \anrualzia pawh kan hmu phâk dáwn ta lo a ni. Lung a léng lâwk e.

Ramthar North lam a\angin Tv.Hrangkima te khabe liam kan ngaithla phâk tawh dáwn lo va, Tv. Thangchhuana (Tee Shou- FB nick) inthlahrung hmél erawh mitthlá-ah a cham reng dawn a ni. Rote-a te nên pawh kan thim ho thei dáwn ta lo a ni! Pu Daniel-a Bial conference rorèl laia a \awng pawr huar’h pawh kan hre phâk tawh dáwn hek lo; a lunglen thlâk dáwn tawp. Tv.Zarmawia tarmit kháng nei bun \hìn, inpe zõ leh phur êm êm \hìn pawh a ngaihawm dáwn hle mai. Ka sawi vek sêng lo! Kei hi, sap thufing ang lo tak maia chhim thâl bekang puah phawng phawng chi, \awng tam si, \awngkam thlum si lo ka ni a, mi rilru ka ti ná em ka hre lo. Tu chungah pawh lungnih lohna kan neih chuan intheihnghilhsaktawn ang  u.

Kan Bial hi  Bial lian ber kan ni a, Mizo pa chhûngkaw rual ang deuh kan ni a, chhûngkaw hung tak, dar insi khupa behlawi bai hmeh ang deuh hi kan nia! Mizo pa chhûng rual pawh hi indang \hen se chhûngkaw intodelh tak tak leh patling fel tak taka chhuak tùr kha an indîp ral \hìn a ni. Atîrah chuan kan in\hen tùr hi huphurhawmin lunglên thlâk dáwn viau mah se hmeichhe pasal nei tùrin an in a chhuahsan dáwna a \ap ang vêl tho hian tunah lungngâiin kùn rih mah ila, nakina kan lâwmna tùr a la ni zâwk dáwn a ni.

China kuta Hongkong hlan a nih dáwna Prince of  Wales thusawi ‘We shall not forget you and we shall watch with the closest interest as you embark on this new era of your remarkable history’ti chungin Johnny Cash hla (If we never meet again, this side of heaven) hi kan inthlahna hla pakhatna lo ni se:

“Khawvêlah hian in\hen a \ûl leh \hìn,

Luaithli nula in\hen a báng dáwn lo;

|henlohna khawpui kan thlen hma loh chuan,

Pathianin véngin min hruai rawh se.”

A pahnih nán chuan-

“Mahse in\henna dár a lo ri

Nangni Ramthar leh Ramthar North unaute u

Dam takin aw, dam takin,

Chibai, Mang\ha ule.” tih hi.

Note : Vol XII   Issue No. 12 :  Thalai Aw  :  Electric Veng Pastor Bial K.T.P.,  Aizawl  :  December, 2010   :    Phek  4-a tihchhuah tura 7.1.2011-a ziak a ni