ZANTIANG TAWNMANG

“Zanin ka lungleng reng hi,

  Ka dawn vel eng vang nge ni? 

Chhawrhthlapui en vang em ni? 

A ni lo nunhlui liam hnu ngaih vang a ni.”

Chu zan chu, zan dang ang tho a ni. Bial K|P hruaituten kan Branch min rawn tlawh avangin inkhawm pangngai aiin a rei deuh a; inkhawm banah inkawm khawmna kan nei. Bial K|P kalphung leh Branch hrang hrang kalphung kan inzawt diat diat hlawm. Zan dar 10 : 00 a rik dawn ruai chuan kan \in thei hram a; mahni in lum lam panin \hen khat chuan zan hmasa lama FIFA World Cup 2010 Final inkhel an en chhuanlama mut hlan nghakhlel takin an in lam an pan a. Kei erawh chuan ka hna ngah zia leh mu hman ka nih lohzia ka hai hauh lo. Rilru hmanhmawh ru ang reng tak chuan chu hna chu ka pan a.

Ngaiteh, ka hna thawh tur chuan min lo hmuak a, zan dang ang bawk chuan ka mut pindan lam chu ka pan a. Ka inthlak fel hnu chuan ka khawl ka tinung a, ka tihnun rual ruala thawm lo nei ve ziah ka kel thlun pawh chuan a be dan ngai pata thawm rawn chhuah lehin a be al al a. Chu zawng ka hriat \hin pangngai a ni a; ngaiah ka nei hial tawh reng a ni. 

Chuan, ka hna pangngai chu ka chhunzawm char char a, engdang ka rilru-ah a lut lo, ka hnathawh bak chu. Ka mit tlin tawk ka thawk a, ngaiteh, Sana ka han en meuh chuan zan hmasaa World Cup an chawi lai vel tak a lo ni tawh a. |hing\hi-a Lalpa hnena kuna ka inhlan hnu chuan engmah ngaihtuahna hman ka nei lo; ka muhil zui nghal mai ni awm a ni.

Harh miah lo chuan min ko thawm hi ka hre ta a,  chuti chuan ka han meng a, chuan ka kiangah hian ka farnu hi a lo ding ran a. Ka mobile Sana ka han en nak chuan Zing dar 8 : 12 a lo ni der a! Ka farnu chuan tuk\huan ei turin min lo kaitho chu niin.

HMING THAR

In nuten engtin nge an koh \hin che u, an ko duat \hin che u em ? A \hen chu ‘Mama’ te an ti che u a, a \hen chu ‘Mami’ an ti \hin bawk che u ti rawh u. Mate, Tete, Mambawih te an ti \hin bawk ang che u ti r’u. Chutianga min koh chuan a nuam \hin ti rawh u. Duat deuh maia nu leh paten min han koh hi chuan a nuam \hin khawp mai. Miin min koh nan hian ‘Suala’ emaw ‘Vira’ emaw ‘Hmela’ min han ti mai sela chuan kan lungawi duh lo viau ang.

Naupang pakhat Siama hi Sikulah hian a sual \hin em em mai a, mi zawng zawngin Siam-Suala tiin an koh \hin a. A chhan chu a ngam zawng leh amah aia naupangte velh a chin em avang a ni. Insualte a hrat a, a huai em em a, mi pawhin an hlau em em a ni. Thil ti tura an tih te hi an tih loh chuan velhah a vau a, an tihsak hnu pawhin a la vel leh tho \hin si a, a sual thiam ti r’u. Siama chu Mama hian a hlau em em mai a.

FELA ANGIN AW

Naupang pakhat fel deuh mai, lehkha zir hun laia zir taima em em mai hi a awm a. A hming chu Fela a ni a, a hming pum pawh Lalnunfela a ni a. Kum tawp ekzam an nei mek a, Fela chuan ekzam zawh hlan chu a nghakhlel em em mai a. An ekzam zawhni ni tur tur a lo thleng ta a; phur takin sikul lam panin a kal sauh sauh a. An ekzam zawh hun a nghahhlel  chhan pawh SIKUL CHAWLH an nei dawn tih a hriat vang a ni.

Fela chuan engvangin nge Sikul chawlh chu a nghahhlel em em mai le? Sikul chawlh hunah chuan a duh dan danin infiam a chak vang nge ni ang ? Lehkha zir lovin zanah a leng thei tawh dawn a, a duh tawkin T.V a en theih tawh dawn vang nge ni ang le ? Nge, chhunah mi inah te, mi veng hla tak takah te a len theih tawh dawn avangin chawlh chu a nghakhlel ni ang ? |hiante nen kawngpui dungah,

PA PAKHAT LEH A MUMANG

Pa pakhat hian  mumang a nei a, a mumangah chuan pa pakhat hi a hmu a,a mihmuh chu mi pangngai ve tak han ti ila, hausa lem lo, hmel pawh \ha lutuk lem lo thuamhnaw pawh hmelchhiat tizual sauh emaw tih turin incheina pawh a nei changkang lem lo, mi ina awma lehkha zir \hin, ruihtheih thil lakah pawh inhnamhnawih lem lo a ni a. Mi ina a awmnah te chuan Bazar-a kala chakkhai lak te, insuk, innawh, in tih fel chu a hna ber a ni a; chutia mi ina awma lehkha zir chunga mite doh loh \ha \ha thawka a awm chu a \hian (Class-mate) teleh mi \henkhat nula leh tlangvalten an hmusit em em a; a nunphung retheihzia an hriat chuan a biak pawh an be \ha duh tawh lo va, amah chuan a mal tlat chu a ni zui ta mai a.

Mahse chupa chuan rilru aneia, a \hiante leh a Class- mate -tena hmusit em em a an en a, an biak \hat duh loh lai chuan ngawrhtakin lehkha a zir sauh sauh a. Pathian \ih chungin lehkha chu a zir \hin a. Lehkha a zir dawn apiangin Pathian thu (Bible) a chhiar hmasa ziah \hin a ni. Pathianin mal a sawm a niang; lehkha chu a thiam em em a. A \hian hlui te chuan lehkha zir pawh ngaihsak lovin; party an ti kur zut mai a, chu chuan an zirlaite a tibahlah a, party an neih fo te chuan khawlohna kawngah a hruailut a, drugs tih te, zu in te an lo chin phah ta a.

Hun  a lo kal zel a, chupa chuan vanneihna a dawng chho ta zel a. mi ina awm a an doh loh \ha \ha a thawh \hinte khan taimakna leh thiltih thiamna tam tak a pe a. Tin, a lehkha chhiar taimak, leh lehkha a zir peih em avang chuan a lo thiam chho ve ta hial a. I.A.S. a han nih meuh chuan a Class-mate \hin te biak pawh be \ha duh lova, kawm pawh kawm duh lo \hin te chuan  an Pu a lo ngai ta a. A zirlaia a thawhrimna leh hrehawm a tawrh thin, a paltlang chhoh zel theihna te chuan a tizahawm zual a, mipawhin an ngaihsan phah em em a ni.

MUMANG ANGA AWM LOH TUR.

Nizanah mumang in nei em? Mumang neih hi a nuam ve mai mai \hin ti r’u. In mumanga in \hiante nena hlim taka in inkawm melh melh laia in \hanharh thutin hrehawm in ti ve em? A nih loh leh, in mumangah ram hla takah in lo zin tawh em? In mumanga in hmuhte chu man nawn leh in tum \hin em? Nuam deuh kan mumanga kan hmuh chuan a nuam \hin khawp mai ti r’u.

Mahse, kan mumanga Ui kawlh te, Bawng kawlh te, Sakawr-ten min lo um vak laia kan tlànchhiat theih lohte hian a hrehawm \hin leh bawk si a; motor kan chuan dawna min lo tlansan daihte hian a hrehawm duh khawp mai ti r’u.

Pa pakhat hian mumang a nei ve a; a mumangah chuan nambar hi a hmu \euh mai a! Chu a nambar hmuh pawh chu nambar 2 (pahnih) hi a ni nghe nghe a. Zingah a han tho chu, “E, nizanah nambar 2 ka hmu \euh mai a, Pawisa khel ila, ticket 2 telna lei ila, ka hausa thut mai thei a ni,” a ti ta a. Fa mipa naupang Mawia leh hmeichhe naupang Puitei a nei a. Sikul an luh  a hun \ep tawh a. Chutichuan, Mawia leh Puitei pa chuan pawisa khelh tumin an pawisa neihchhunte kha a keng chhuak ta vek mai a. Pawisa chu a khel ta lauh lauh mai a. A pawisa kente pawh chu a hmang zo \ep tawh tih pawh chuan a man thei rêng rêng lo mai a. ‘Ka man hlauh takin’ tiin nambar 2 awmna ticket chu a lei zel a, a man thei chuang reng reng lo va. A tawpah phei chuan  a pawisa pawh chu a hmang zo ta vek mai a!! A fate sikul kalna tur, an zirlai bu man tur pawh chu a paih/hmangral zo ta vek mai a. Mawia leh Puitei chuan sikul luhna tur leh zirlaibu leina tur pawisa pawh an nei tawh lo va. Mi sikul luh rualin an lût thei ta lo va. An khawngaihthlâk hle 

A pa chuan a mumang kha mumang mai mai tiin engahmah ngai ta lo se. Pawisa kha khel ta lo sela chuan sikul luhna pawh an nei ve ang maw le. Pathian huat zawng- Pawisa khelh \hat loh zia chu Mawia leh Puitei sikul luh hunah pawh an luh loh phah ringawt mai.A pawi ngawt mai. Engtin nge ni ta ang le ??

A HUAISEN TI R’U

S.Korea-a khaw pakhatah chuan Veng hmawr lamah Biak In lian vak lo a awm a. Chutihlai chuan Kristian an la awm mang lo. Biak In \ha pawh a la awm mang lo va; mahse Kristian awmchhunte chu an rinawm em em a, naupangte pawh taima takin an inkhâwm \hin a ni.

Chutihlai chuan Communist-hovin Kristiante chu an tiduhdah nasa \hin hle mai a, a \hente chu an kaphlum a, an chhungkuain a nung chungin an phûm bawk a, an Biak In neihchhunte pawh an tichhe nasa hle mai a. Pastor te, Upa te an that hnem em em a; mahse Isua an phat duh chuang reng reng lo va. Naupangte pawhin huaisen takin an tuar hram hram \hin. Isua- Naupangte |hian chu an phatsan ve duh lo a ni.

Chu khuaa Biak Inah chuan Naupang pawh an inkhâwm \hin a, nuam an ti \hin em em a, tuk khat chu an inkhâwm laiin Communist Sipaiten Biak In chu an rawn hual thut mai a, a chhûngahte lûtin Silai an lek ta sup sup mai a. Communist Sipai hotu chuan, “Nangni Kristian Mi â ho Isua in rin hi báng vat mai rawh u. Isua hi phat ula, kan zuah ang che u. In phat duh loh chuan kan that vek ang che u,” a rawn ti ta khur khur mai a. An Pulpit hma lam deuhah chuan Isua Khenbeh lem hi an dintir a, a mal mala kal a, chu chu chil chhâk \heuh tûrin an ti a, Chutichuan Pastor-in a \an a, chil chu an chhâk ta zel a.

Nakinah chuan Hmeichhe Naupang fel tawh tak hi a lo kal ve chhet chhet a, Isua Khenbeh lem bul a thlen chuan a \hing\hi rap a, a rawmawl chuan an chil chhâk chu a hru fai mawlh mawlh a, Kraws chu ava pawm a, a fawp ta a, “Isu, ka hmangaih che,” a ti ta mai a!! Chuveleh, Sipaite chuan an kâp let ta tawp mai a. Mahse, chu chu an Pastor-in a hmuh veleh, “Isu kei pawhin ka hmangaih che,” a ti ve leh ta a. Mi dangte pawh an rawn kir leh vek a, hmeichhe naupangte tih dan chuan an rawn ti leh ta vek a. Chu Biak Inah chuan Sipaite chuan an hàl khung ta a. Hmeichhe Naupang huaisen tak mai avàng chuan mi dangte pawh Isua hming \anin an thi ve ta a. Mahse, an thisen chu a thlàwnin a luang lo va, Korea rama Harhna lo chhuah \anna leh Kristian lo pun zelna atán Pathianin mal a sàwm ta zâwk a ni.

Hei pawh hi khawii atanga ka han siamrem vel nge ka hre tawh chuang lo...ehp

AN HUAISEN NGEI MAI

|um khat chu Pastor Yong Shon-a fapate 2 Tongin-a leh Tongsin-a te chu Sikul an kal laiin an sikul chu Communist Sipaiin an rawn hual thut mai a ! Tongin-a zawk chu sipai chuan a silai chuan a tin ta run mai a, “Pathian thu i awih leh chuan ka kaphlum ang che,” a ti chhur chhur mai a. Mahse Tongin-a chuan Pathian thu a awih tlat a. Pathian thu a hrilh ta hlauh zawk a. Chutah Sipai pa chu a thin a rim a, a meng sen ta rum a.Kahhlum nghal a tum ta mai a ! Chutihlai tak chuan, a nau Tongsin-a a chu a lo tlan a, “ Ka u hi chu chhuah laa, kei hi min kaphlum zawk rawh,” a ti ta mai a. A huaisen ti r’u.

Mahse a u chuan, “ Kei hi a upa zawk ka ni a, min kaphlum zawk rawh,” a ti ve tlat bawk a. Pathian phatsan an hreh chu Sipai chuan a haw ta em em mai a, an unau chuan a kaphlum ta ve ve a. Pastor Shon-a chu a fate Martar-a an thih ngam avang chuan a lawm em em a (Martar-a thi tih chu Pathian an phatsan duh loh avanga an tihhlum ang chi hi a ni). “ An hmel chu pangpar mawi tak angin a engmawi a, an va hlim em !” tiin an ruang chu a thlir zui vawng vawng a.

Mizoramah chuan tihduhdahna kan tuar ve lo. Kan vannei khawp mai. Khawvel ram tam takah chuan Pathian ringtute tan hmun a awm lo va, inkhawm an duh pawhin inkhawm an phal lo va, inkhawm chak ngawih ngawihin an awm \hin. Keini chu inkhawmna hun \ha tak kan neih pawhin kan inkhawm peih lo va, kan thatchhe deuh hlek \hin a ni.Mahse huaisen taka kan awm a, Pathian kan \an ve tlat dan tur chu :dawt sawi loh te, Taima taka Sande Sikul kal te, Isua duh zawng tih te, mi tihbuai loh te, rukruk loh te, nu leh pate thuawih hi a ni ngei ang.

He thu hi khawii atanga ka lak / siam rem nge ka hre tawh lo.....ehp

Lungawina kim

12.03.2007

SSAVK|PINKHAWM

Ka tlakchham thu sawi zawng ka ni lo ve

Kei zawng eng ang pawhin awm mah ila,

Lungawi zêl ka ching tawh si a.

         (Phillippi 4 : 11)

Khawvelah hian thil hlu ber eng nge ni? ti ila, mi tam tak chhhanna tur chu- Lungawina tih hi a nih a rinawm a, chhanna dang pawh a awm tho awm e.

Khawvela kan awm chhung hian  lungawi hi a har em em mai a. Sum leh pai, ro hlu leh thildang neih tam leh tlemah pawh lungawina hi a innghat ber lem lo niin a lang a. Khawvel mi, Pathian ring lo rau rauah pawh hian lungawi thei, thil ngaithiam mi, thil hrethiam mi hi awm a ni \hin a. Mi, eng anga hausa pawh, duh duh nei thei pawh ni se la, a chantawka a lungawi loh chuan a rilru a hrehawm \hin a; engmah nei lo mah se, a thoil neih chhunah mi a lungawi miau chuan chu tluka hlu chu a awm dawn em ni?

Sap rama hmeithai pitar pakhat chuan serthlum kung tlemtê a nei a, a rah duh em em mai a, chumai chu a pawisa hmuhna a ni a, serthlum chu a intunnunna awmchhun a ni a, a hlim thei em em mai a. Chu hmeithai chanchin chu Queen Elizabeth-i chuan a lo hriat chuan a awt em em mai a, chu hmeithai hnenah chuan, A nun awhawmzia leh a awhzia thu a hrilh ta a. Chu hmeithai pitar chuan, “Nang chu ram ni tla seng lova roreltu i ni a, i duh duh i eiin i in thei a, kei chu ka serthlum kung tlemtê hi ka neihchhun, ka eizawnna a ni mai a, awh tlak ka ni hlei nem,” tiin a chhang an ti. Chutah British lalnu Queen Elizabethi chuan, “Ram ni tla seng lova roreltu ni mah ila, kan ram chhunga kan thil neih leh ro ka rel theihna leh duh ang ang nei thei dinhmunah pawh awm ila, ka lungawi tak tak hlei nem, nang chu i thil neih chhunah i lungawiin i hlim em em a, hei hi a lawm ‘ka awhna che’, lungawina thil tlemte-ah pawh i nei thei hi ka awhna chhan che chu a ni,” tiin a sawi an ti.

Lungawina tih te, lawmna tih te, hlimna tihte hi thuhmun angah pawh a ngaih theih awm e. Khawvela kan khawsakna, kan chennaah hian lungawina leh hlimna leh lawmnate hi kan zawng \hin a. Kan thiltih hrang hrang pawh hi han ngaihtuah hian nakina kan hlimnna tur emaw, tun hun la laa kan hlimna a ni thei dah law maw tiin kan thawkin kan ti \hin a ni. Hlim leh lawmna, lungawi lohna tur awm thil chu a hlauhin kan hlau hlur mai a nih hi.

Book Review - VANGLAINI EDITORIAL COLLECTION

Ziaktu : K.Sapdanga
Chhuahtu         : Vanglaini
Chhuahna hmun : Charity Press, Aizawl Venglai Mizoram
Chhuah kum : 2004
Phek :
A man : Rs. 195/-

He lehkha bu ziaktu hi kum_____ a\anga chanchin bu enkawl lama hnuhma lo nei tawh, ______ a\anga vawiin thlenga VANGLAINI Ni tin chanchin bu-a Editor ni mek; Evangelical Weekly, The Revival-ah Editor a ni bawk a. He lehkha bu ziak tur hian a âwm veng vawng hle a ni.

Hetiang lehkhabu hi Mizorama a vawikhatna niin a hriat a; Mizoram Literature khawvelah mel lung pawimawh tak pakhat a ni. Kum 2001 chhunga VANGLAINI Ni tin chanchin bu chhuak Editorial dah khawm a ni a; 2001 chhung tih a ni nachungin, Jan 13 a\anga Dec_____ thleng a ni. A bu hmingah pawh VANGLAINI  Editorial Collection a nih ang hian thu hlawm khat fel taka tum neia ziak a ni hran lo va, a hun laia thil thleng mil zela ziak a ni a, thil chi hrang hrang ziahna a ni ber a. Bawm pakhata thil chi hrang hrang dah a, kan ngainat leh duhzawng / vei zawng deuhte kan dah thuah/ nawn hi a ang ber a. Fiction a ni lo va, Story a ni hek lova, Modern History huanga khung len theih chi a ni ang.

A bu chhung thu han chhiar hian kan ramdinhmun a chiang hlein a hriat a : Sorkar pawh policy nghet leh mumal nei lo, politician pawh ram \hatna leh an aiawhte ham\hatna ngaihtuah lem lo va mahni pumpui \anghma hai; loneitute / huan neitute vulh len lam aia an thlai thar hralhna pawhngaihsak lo sorkar; sorkar hnathawk chan tawka lungawi lo va nawrh hrat leh thil phut ngah tak kan nih thu a hriat theih a. Zirlaiin an hriatna tizau atan chhiar se la, politician-ten ram hruaina kawnga hma an sawn theih nan leh thlir dan dik an neih theih nan zir chiang se. Lehkha bu chhiar that chhe deuh pawhin thu hlawm hrang hrang a nih avangin a chhiar bek bek theih a ni.

No Tolerance Week Kan Hman Mêk hi

 No Tolerance Week Kan Hman Mêk hi

-Ellis H.Pachuau

Tun laiin Traffic Police lam chuan \an lain Traffic dan bawhchhia apiangte chu inngaihdamna nei lovin an chungthu an rêl nghal zêl niin ka lo hria a. Traffic Police-te chuan hemi hun chhûnga harsatna an tawh loh nán lirthei khaltute chu fimkhur tùr leh document leh license pawh fel thlap tùrin an chah a ni.

Hetiang hun hman a ngai ta hi a mak ka tiin, a lungchhiatthlâk hlein ka hria. Traffic Rules bawhchhia an lo hrem ngai lo nge ni? Ni dang / hun dangah khân an hmuh reng pawh an lo hrem ngai lo nge ni a, mahni insawifiah thiam thiam leh sawipuitu nei \ha kha an lo ngaidam zêl zâwk ni? A hrem chu an hrem ngei chuan ka hre si.

Tunah hian man tâwk pawh an \hahnem tawh fû niin a hriat a. Chhiah pawh an chhüng lût \euh tùrah lo ngai phawt ila. Traffic Rules bawhchhe tawh phawt chu hrem lohvin chhuah lo se la, Inngaihdam lohna kar nimai lovin  Inngaihdam lohna kumhlun ni reng se a \ha hlein ka hria. Dàn zam a awm chuan a lekkawhtu berin an lek kawh \hat loh chuan tuin nge lek kawh se kan tih le? Nge ni, hetiang kár khat daih lek hian Traffic Rules hi kan lo nei zâwk.

Zurui berh ve tak tak, MLTP Act an bawhchhiat avànga Lock-up-a zan riahtîr leh Central Jail hiala thawn an nih mêk laia a chethei zâwk, Lirthei nei zâwkte dàn bawhchhia kan lo ngaidam fo a nih chuan thil \ha ber a niin ka ring thei lo. Dàn chu dàn a nih angin a kal mai tùr a ni dáwn lo’m ni?

Kan ram khawpui ber kawngpui hi diak leh tui luang a la tam êm êm mai a; chutih rual chuan mipui kalna tùr bîk a la tam lo bawk nên. Furpui laiin kawngpuiah mahni thuamhnaw neih \hat ber leh fai bera kan inthuam a, balh hlau ngawih ngawiha kan kal dêm dêm laia Motor chak tâwka rawn tlãnin min han chil per puat puat a, min han tlan pel leh daih \hìnte hi man theih dàn tùr Rules-te hi awm nghe nghe se ka ti asin!

Lirthei khalhtu lam pawh kan fimkhur a, kan hawihawm zual deuh deuh pawh a hun tawh a ni. Lirthei khalhtu \henkhat, kekawr bul leh tawnzau nena inthuam, chapal bun, kesir nõ lo ve tak taka an awm ringawt mai hi chu kan inenfiahna tùr a niin ka hria. Silchar Reckshaw pû niawm tak tak pawh kan awm nuk mai a, \hing, bal, khãk zet maia lirthei han khalh ngawt hi chu Public Service tán phei chuan a mawi lo êm êm a ni.

A khar nán - Traffic Rules pawh hi puanzar tam ni se. Lirthei khalhtute pawhin chu Rules chu hre bel êm êm se la; rui lo hai lovin kan Police-te paw’n dan chu lekkawh se a \hain ka ring. 

- Ellis H.Pachuau

Aizawl Venglai

(14.09.2004)

(He thuziak hi Ni 17.09.2004-ah VANGLAINI Daily News Paper- Chhiartute Huangah tih chhuah a ni)

A MAK A NÂ !

 A MAK A NÂ !

-Ellis H.Pachuau

Famkim lo khawvêla chêng mêk hring fâte hian Siamtu'n a rel dàna lungawi zo lo ang hrimin suangtuahna hlimthlâ, a tàk ram hmuh mai theih si loh hianin kan nunah bu a khuar a, a la chenchilh zui bawk a.Ta se, ta lo se ti reng reng hian kan hmanhlel a. Kan awm dàn hi kan duhkhawp tâwk lo nge ni ?  Amah kan pi Evi rinna chak loh lai, a chauh lai leh mawina ît a, amah ngei siamtu din dànah pawh lungawi tâwk lovin Siamtu an a duhna rilru chu kan la chhawm nung zêl pawh a ni mahna. Kan pi  a ni miau va !! 

Hring fâte hi zawng ze inang lo tak tak hi kan ni nuk a : A \hente chuan thil rêng rêng hi a thim zawng hlirin kan thlîr a. Mi dang lehte chuan an thil tawn chu a hrehawm emaw, a harsain an tán a buaithlâk viau emaw a hlimawm lam a ni emaw an tawn apiangah an chungah eng pawh lo thleng se a êng zawng hlirin an thlîr hram hram \hîn a. Chû'ng mite thlir dàn chu thlir dàn duhawm tak a ni a; an vannei bîk a ni. Mi tam tak chuan an thil tawn apiangah ' Lâwm zêl ta'ng e ' tih hla ring taka an sak theih mêk zêl laiin, a \hente erawh chu mahni chantâwka lungawi lo rêng rêngin ' Ka chantâwkah ka lungawi lo ' tih hla aw pawh tichhuak \ha peih mang lovin kan sa nawn riai riai mai zawng a nih hi maw. Mahni chantâwka lungawi ngai rêng rêng lote hi mi vanduai tâwpkhâwk chu an ni mai lo maw ?

Amah kan pi Evi bawk khan lo bawhchhe ta lo se la chuan lungawi lohna kan  neih pawh hi awm lo tak maw ? Lei mihringten ânchhia kan dawn, khawvêl thlir dàna kan thlir a, chhiatna tàwpkhâwk- 'Thihna' avànga lungngaihna tuartute pawh hian Siamtu rorelna a nih zia hriatthiam a har a nih hi. Puh-mawh tùr apui kan zawng a, kan taimâk vàng pawh ni lèm chuang lovin, kan ngaihtuahna kan vah kualtîr vêl a. ' Ni berin a lang' tih mai mai kan chaw tak khûkpui luai luai mai a nih hi. Motor Accident-a thi an awm chângin : a motor \hat loh vàng te, a khalhtu tihsualte leh eng engemaw kan puh kual vêl a- 'ta se, ta lo se' ti rêng rêngin thihna pumpelh a nih theih dàn tùr mawlh kan ngaihtuah a; a sawt tawh chuang der si lo.

Natna khirh tak veite an thih châng lahin : ' A natna chu lo hre chhuak hma ni ila chuan kan inchhan hman tùr a ni a; mahse kan hriatchhuah meuh chuan kan tlai lutuk tawh a, kan inchhan hman ta lo a ni' tiin kan rin thu kan la sawi \al'h a. 'Ila chuan' tihte leh 'ta se' tih hi chu chhûlkhat kual an ni a, sawi hran \al'h pawh tum ila, a harsa hle chuan ka ring.

Tualchhung Chanchin Bu Enkawl

200603AV

Thuhmahruai

Véng tina Kohhran hrang hrangte hian Tualchhûng Chanchin Bu kan chhuah deuh \heuh mai a. Thuziak pawimawhzia leh thiltihtheihzia kan hriat chian avàng pawh a ni mahna. A enkawltu tán chuan a hautak záwnga thlûk chuan thil awl-ai tak zawng a ni hauh lo mai a. Pawngpaw ba sa ngam a, enkawl ve ngawt chi a ni mai si lo. Heti a nih avàng hian Tualchhûng Chanchin Bu \henkhat chu 'Information Bulletin' a ang zâwk mah rêng a. Chanchin bu chhuah ngawt hi chu a harsa hran lèm lo va; amaherawhchu , chanchin bu \ha neih erawh chu a harsa hle thung. Tlêm tala harsatna phuhrûkna a nih beiseiin mi thiam zâwkte ziak tlawhchhanin, mahni tawnhriatte sáwm khâwmin theih ang angte  lo tarlang ila.

Enkawltute mawhphurhna

Inpêkna tel lo chuan khawtláng leh Kohhrana kan rawngbâwlna hi a hlawhtling thei lo va. Chhuanlam kan siam dáwn chuan chhuanlam nei thei \heuh kan ni tih inhriat hmasak phawt a \ûl. Piangthar lo kan awm chuan pianthar hmasak phawt a \ûl. Chanchin Bu chhuah hi dàn ang leh tih tùr pangngai tihhlawhtlinna a ni mai lo va, chanchin bu chuan chhûng tin a thleng tih hriat a, sâwttlânna leh rawngbâwlna atána chhuah a nih hriat reng tùr a ni.

Chhia leh \ha hriatna hman thiam a pawimawh a, Kohhran Thurin leh kalhmanga dingnghet nih a pawimawh a. Thu lai la mi, tun lai thil thleng hre zau rilru zau leh inzir peih mi, rilru tluang tak, ti kher kher peih si, thil chîk peih nih a \ùl a, sawiselna tuar thei leh a \ul huna tuang tichhah ngam nih a pawimawh hle.Kohhran / Khawtláng kalphung / hawiher/zia pawh zir chian a, ngaihven peih a \ûl hle bawk.

Chanchin bu enkawl hi huho rawngbâwlna a nih avàngin chanvo insem a nih pawhin kan theih leh tlin tâwka kan mawhphurhna hlen tum tùr a ni.Thu chhuah tùr chungchângah zawh àwm mite zawh peih a, taima taka thu hriatte bawhzui a \ûl a, thu thar la khâwmtu bîk tán phei chuan zawhna lai awm deuh hmun pawh thliar thiam a \ûl hle a ni. Taimak fal, inpêk fal, ruahman lâwk thiam a pawimawh hle.

Conference kal ve thu

 Conference kal ve thu

-Ellis H.Pachuau

“Kha, mitdel chem vaiin kan pik ve a ni e, a fahrah viau mai thei,” tiin Ruata Zadeng chuan a article chungchánga a insit thu Phuaibuang-ho tih dàn takin a bekdawm (mobile) hmangin min rawn hrilh a. VENGLAI Chanchin bu (2008)-a article of the year-a ka lo hual a ni a; a rawn thlawh chhuak ropui nameuh mai le. ‘Venglai Dara’ tih mai pawh a phû hliah hliahin ka hria!

Khatia, a duh lam hawi záwng záwnga a kam \huahna a pik tâk puat puatah chuan, kei, Záwngin khaw tui liak meuh pawh min pik khum ta bawrh bawrh kha a ni a! Lo Sepui ruah tuar ve tlawk tlawk rîkngawt chu kei sipai rilru lo chhuak ta hian a thei lo a ni ber mai a. Ka han chhim thal bekang puah ve phawng phawng ang a, ár chuk tui lo khawp chuan kan inchhuah êm lo vang chu.

Ruata Zadeng angin tlangval hnu-a K|P Gen. Conf. kal nawm thu sawi kur dup tùr ka hre ve hran lo va, pawn thuah tel meuha vawi khat ka chhuahna ve chu thuziak hmanga han umzui hrãm chu ka duh ve bawk si a; Tu emaw anga 90’s chho bawr vela senior lam in\an tawh hnu-a Conf. lo kal daih tawh ka ni lo bawk nèn. Vawi khat kal naa vawi khat tawnhriat, mita hmuh leh benga hriatte chu thlasik mau puahpui phawng phawng ila a ni mai alãwm ka ti ta deuh.

Kan pik-pak teh ang

 Kan pik-pak teh ang

-Ellis H.Pachuau

Hmânah kha chuan lehkhathawn hi kan ziak vak vak \hìn a, \hian a ni emaw, chhungte lehkhathawn a ni emaw, a...zêp nâk emaw hmangaihte lehkhathawn pawh a ni e, chumi piah lamah Sikul kan kal lai chuan chawlh dilna pawh a ni bawk. Thawn chhuak hnem nà nâ na chuan a dawn pawh kan dawng hnem narawh e.

Kan lehkhathawn dawnte chu inhlut hleih tak pawh an ni hlawm! A \hente chuan thingrem mawng an chang a, chhûngten an hâi thulh pawha an hmuh mai theih loh tùrin kan han thukru a! A \hente chu dah\hat chu sawi loh, kan nuai hlawm nawk nawk a, kawmchárah kan vawm chhuak nawl nawl mai \hìn kha a ni a. 

Lehkhapuan pawh a inang lo nuaih a, a \hen chu rûlrin hmanga ziahte a ni a, a \hen chu naupang exercise book pawh thlâk tih hriat reng rengte kha kan han dawng \hìn kha a nia. A lehkhapuan \hat leh \hat loh lam kan ngaihtuah lo va, a thu lam kha a ni zâwk kan ngaihtuah chu.

Ka lo tar ve tawh rêng em ni?! (Chawngkhum dàn tláng huat loh)

Ka lo tar ve tawh rêng em ni?! (Chawngkhum dàn tláng huat loh)

-Ellis H.Pachuau

Miten, “Nupui nei tawh rawh,” an ti ve ta chhen mai! Engmah lah chu an hre der si lo va. VENGLAI  Editor Butru zet pawh hian tar min han tih ve tawh chu! Tar hi engtianga teh chi nge ni a, kum upat lamah nge kan teh dawn a, ngaihtuahna upat lamah nge, intihupat chawp lamah ni zâwk ang? tihte min ngaihtuahtîr lo thei lo. ‘Tar’ tih hrim hrim hi Oxford Dictionary pawh han zawt kual vel ila, ‘tar1’ chu kan hriat thiam zawngin alkatara tih bâkin min hrilh lo va, ‘tar2’ pawh chu  lo awm ta tehreng pawh ni se, lawngpû tena an thil zàr \hin ‘tarpauline’ lamtawi bak min han hrilh leh tùr chuang a hre hlei law. Encyclopaedia Britannica lamah pawh han zawt pawh ni ila, chuti tho chu. Kan tar sawi chu a lo hre ve aw kawng lo mai. Chu lam lo zawnga zawh chi chu a ni a, anmahni \awnga lo zawh zâwk tùr a ni. Chutianga zawh chuan a hre nameuh mai le! Thil hi a ni lam zawng chuan a kal purh a, a ni lo lam zawng erawh chuan a sak \âk \hìn rêng a ni.

Bial K|P Rencontrez Semestriel

June 26 & 27,2010 chhûnga Electric Veng Pastor Bial, Bial K|P kum Chanve Intawhkhâwm kha i han thlîrlet dáwn teh ang. A che che sih hlawkah, a nui nui banah! |awngdang ka han zep nuai’h a : African \awnga kum chanve intawh khâwm tihna mai a ni e.

Zan khatna, inkhâwm vawi khatna  chu : Reports inkhâwm a nih avàngin kum chanve chhûnga Branch 5 leh Pastor Biala Bial lian ber reports chu a rei lo thei lo.|an dár rik a\anga  dárkár 1 leh a chanve minit 1-a a pelh hnuin Hla hnuhnung kan sa \an thei hrãm. Reports pawh a sei záwng pawh a inang tawh viau mai. Sawi hrãm ka duh chu Budget tih hi Batjet tia lam lovin Bajet tia lam a dik zâwkin ka lo hre ve \hìn.

|ah hla kan thlâk

Kan ram hian eng a ti zõ ta nge? Heti êm êma ruihhlo avànga a dam tâk loh le?

        “A tûr a nâ e, zungzâm a fan zõ,
Râwlthar dâwntuaite a dàwi ã mêk e;
Nángma tán a pawi lua, i dáwn chiang lo a ni,
Aw, Mizo tlangval, famkhua i lawi dáwn e,
Sim rawh, bansan la, Ruihhlo hi hmêlma a ni,
Aw \ang fan fan.”
-Lalsangzuali Sailo

Eng tik a\angin nge?

Kum 20 kal ta vêlah khán kan \henawm State-a Mizo hnahthlâkte chuan an fâten drugs ti lovin zû in \hìn zâwk se an tih ngawih ngawih \hìn thu an sawi kan la theihnghilh hman âwm lo ve. Khatiang hun kha tawng ve tùrah kan lo inngai lo va; nimahsela, a zual zawpui vailenhlo tih chu nêp tê a ni ringawt. 1984 vêl a\ang khán drugs (heroin) thihpui kan awm \an a, a hmangtute pawh mi hausa fâte niin, heroin hman lar ber a ni \hìn. Hun a kal zêl a, heroin mai bâkah proxyvon ruih nachang hriat a ni ve leh zêl a; 1990-ah chuan proxyvon hman sual avànga thi an awm ta hial mai! Ruihhlo ngaitute pawh mi hausa fâte chang ni tawh lovin mi hnuaihnung zâwk fâte nèn lam kan rui ta zêl zawng a nih hi. 1990-2002 bâwr chho-ah chuan kan \halai tam takte chu ruihhlo bâwihah an táng a, \halaite tán ruihhlo vànga a thim chhah lai ber a ni hial âwm e.

World Cup Zunzam : O Maradona!

Kei, Argentina \antu, naupan laia Exercise bu kawma Diego Armando Maradona thlalak (World Cup a fawhna) chuanna hmang ve tawh hian football lamah hnuhma nei lian ve lem lo mah ila, khawvela football inelna sang ber, the greatest show on earth an tih hial FIFA World Cup Football chungchang sawi ka han tum ve chu a nia! Football khel tura thlan awm tawh reng renga vawi khat mah first eleven-a la koh ve ngai loh hian eng khaw kha sawi tur pawh ka hre lo reng a...Coaching lamah erawh chhuan tur ka nei : Branch YMA Tournament siama \um khat Champion Coach ka niha Cup ka chawi lai thlalak dah \hat tur ka nei ve tlat.

ELLIS H.PACHUAU

Ka Naute

Keimah

Sangpuii

Sermon - PENTIKOS THUCHAH

Chhiar tur : Tirhkohte Thiltih 2 : 1-4

1Tin, Pentikost ni a lo thlenin, an zain hmun khatah an awm khawm vek a. 2Tin, thawklehkhatan van ata ri, thlipui tleh angin a lo thleng ta phut a. Tin, chu chuan an \hutna in chu a tikhat ta vek a, 3 tin, leite te, amaha insem darhin, mei angin an hnenah a lo inlar ta a. Tin, an chungah chuang \heuh va, 4an zain Thlarau Thianghlimin an khat ta vek a, Thlarauvin a \awngtir ang zelin \awng dangin an lo \awng ta a.

Hmanlai hian Zawlnei putar pakhat nakina thil lo thleng turte hre lawk thei em em mai hi a awm a, amah chu tu nge a nih in rin? Chu pa chu zawlnei Joel a ni. A hriat lawk theih chhan pawh Pathianin a hrilh \hin vang a ni a.

|um khat chu, chu pa chuan Pathian hnen a\angin thu mak deuh mai a dawng ta a……chu a thu dawn chu tihian a sawi chhuak ta a: ….mi zawng zawng chungah ka thlarau ka leih ang a; tichuan in fapate, in fanuten ka thu an hril ang a, in putarten mumangah an mang ang a, in tlangvâlten inlârnate an hmu ang a: chung niahte chuan ka bawihpate, ka bawihnute chungah pawh ka thlarau ka leih ang a. Vanah leh leiah thilmakte ka hmuhtir ang a, thisen te, mei te,meikhu ding te nen,” tiin (Joela 2 : 28-30). Thil lo thleng tur a sawi lawk hun hi hmanlai Isua pian hma kum 400 daih tawhah khan a ni. A rei tawh in ti em?

Sermon - TITA ( Bible Study / Character Study)

Chhiar tur

II Kor. 8:16 : Tin, in chunga ka \hahnem-ngaihna ang Tita thinlunga pe thintu Pathian hnenah chuan lawmthu awm rawh se.

Tita 3:8 : “Pathian ring tawhte chuan thil \ha ti zel turin ngaihtuah rawh se,”

Tita Chanchin tlangpui :

Tita hi Jentail Kristian, Grik mi a ni a (Gal.2:3). Paula \hian leh rawngbawlpui \angkai tak a ni. Paula meuh pawhin “Rinna ka fa tak tak (Tita 1 : 4) a tih avangin Pisidia rama Antiokei leh Pisidia rama a chhehvela rawng a bawl laia piangthar a nih a rinawm. Paulan “Ka unaupa (II Kor 2 : 13), ka \hian leh ka hnathawhpui’ ( II Kor. 8 : 23) a ti hial \hin a ni. Jentail-te zinga rawngbawlna chungchanga Jerusalem-a Kohhran hruaitute ráwn tura Paula leh Barnaba an kal khan Tita hi an hruai ve a ni (Gal.2:1). Paula lehkhathawn pathumah chiah a hming hi tar lan a ni na a (Kor. , Gal., 2 Tim.), Korinth khuaa Tirhkoh Paula Lehkhathawn pahnihna-ah hian Tita hming hi vawi 9 lai mai a lam a; Korinth khua-ah hian Paula hian vawi 3 lai mai a tir niin an hre nghe nghe a ni. A vawi khatna chu Jerusalem \ám \anpuina thawhlawm buatsaih turin a ni a ( II Kor. 12 : 18), vawi hnihna chu Paula lehkha pe tur leh an Kohhran buai \helh turin (II Kor. 2 : 3,4 ; 7 : 8,13,14), a vawi thumna chu lawmthu sawina lehkha keng tur leh a kal hmasak lama thawhlawm lo buatsaih tura a tih kha la khawm turin a tir a ni ( II Kor 8 : 6,10, 16,17,23,24). Hetiang ti tura Paulan a han thlang hi tleirawl te mah nise, thusawi thiam leh mi hneh thei tak a ni ngeiin a rinawm.

Sermon - RINGTU NUN |HANLENNA

Chhiar tùr :

Lk. 1:38 : Tin, Marin, “Ngai teh, Lalpa bawinu ka ni, i thu ang zelin ka chungah thleng rawh se,” a ti a.

Mat. 5:16 : Chutiang bawkin in eng chu mi mit hmuhin eng rawh se, chutichuan in thil tih \hatte an hmu ang a, in Pa vana mi an chawimawi thei ang.

Joh. 12:28 : Ka Pa, i hming chawimawi rawh,” a ti a. Chutichuan van a\angin aw a lo chhuak a, “Ka chawimawi tawh, ka chawimawi leh bawk ang,” a ti a.

1 Kor. 10:1-6 : Unaute u, heng hi in hriat loh ka duh lo ve, khatia min thlahtute zawng zawng chhum hnuaia an awm vek a, an zaa tuifinriat pawh an kai vek a, an zaa chhumah leh tuifinriatah pawh Mosia bel tùra baptisa an awm vek a, an zaa thlarau lam chaw hmunkhat pawh an ei theuh va, an zaa thlarau lam in tùr hmunkhat pawh an in theuh kha; anmahni zuitu thlarau lam lungpuia mi kha an in theuh si a; chu lungpui chu Krista a ni. Nimahsela, an zinga mi tam zâwk chungah chuan Pathian a lungni ta lo va; thlalerah khán tluhlumin an awm a. Tin, chung chu kan tán entîrna a ni, thil sual an chak ang bawk khán kan chak ve loh nan.

1 Kor. 10:13 : Mihring tuar theih ang chauh lo chu thlemna reng reng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlemna in tawh a phal lo vang; in tuar theihna tùrin thlemna rualin tlan chhuahna kawng a siam nghal zâwk ang.

              Ringtu nun \hang lian zêl tùr hian kawng hrang hrang pawimawh tak tak a awm a, sawi vek sen pawh a ni hek lo vang a, zanina sawi ka’n tum chu kawng chi thum a ni a:

Thu dik chu a la inlár chhuak ang

Lemchan

 Changtute
1. Nghâka : Sikul naupang Class IX
2. Khuma : Nghâka pawlpui
3. Headmaster : Nghâkate Sikul Headmaster
4. Peon : Nghâka-te Sikul Peon
5. Nghâka pa
6. Nghâka nu
7. Zirtîrtu
8. Khuma nu
9. Khuma pa
10. Nghâka Nau
11. Sikul naupangte


Ziaktu
Ellis H.Pachuau
040320001230AMAV
LAN  I
(Sikul pakhat : Ni khat chu Nghâka’n sikul a thleng hmasa ber a; Zirtîrtu \hutna hmuna Chair chhia lo let reng chu a hmu a, tuin emaw a tihchhiat luih a ang hle a. A kal hnai a; a chhiat dànte ngun fê hian a en a.)
Nghâka : Headmaster hnêna sawi vat tùr a nih hi (Chutia Chair a lo thlêk lai tak chuan an pawla mi Khuma, amah er em êmtu a lo lût ve a. Ani hi Nghâka nêna inel chho reng an ni a; Khuma chuan Nghâka chu a en kal a)

THIHNA TûR

Changtute

Muana : Tlangval fel tak

Manuni : Nula, Drugs addict ngaizawngtu

Fela : Chhûngkaw pakhata hotu/pa ber

Sangtei : Nula, Fela fanu

Zara : KTP Hruaitu

Rini : Nula, Muana \hiannu

Changtu dang

1. Fela nupui

2. Fela fapa, tlangval

3. Fela fanu, tleirawlte

Mamawhte

1. Dar vuak tùr (Keyboard play)

2. Rinna Thutiam Ip

3. Rs.20

4. Holy Bible

5. Kristian Hla Bu

6. Tea cup 3 & Tray

7. Photo album

8. Mouth piece 3 aia tlêm lo

LAN - I

(He Lan-ah hian Rintea leng haw,

Manuni’n a thlah lai tihlan ni se)

ZORAM HUN INHER

1.  |hál favang romei tláng tin bâwmtu zîng ri riai,

     Lung tiléngtu hawihte’n a her chhuak a;

     Khua tin chuanin han thlîr vêl teh mah i,

     Kan Zoram nuam hlimtea tual kan lênna;

     Thing rihnîm leh \uahpui leh vâu vul a mawi,

     Chhîngmit a tlai ngei e, Pár ang kan lâwm za.

2.  |hál favang kawl êng tùrnî iang a her liam a,

    Khua tin hawi vêl i tláng tin ro rep e;

    Chungléng va tin erawh pár ang an lâwm za,

    Duh tin dáwtin, thing tin, zár tin an bêl e;

    Mahse maw léng tin va léng lung lâwmna kha,

    Pàrlai a tliak hring hnah thar siam nán maw e.

3. Hun pui sul angin a lo inher liam zêl a,

    Zua tin, vál tin tùk loh ram dai lama’n;

    Káwla ni chhuak chhiarin an liam za a,

    Chûni leh \haléngite’n pâi-em phurin,

    Nuihiauvin maw tuahthing an phur an hlim za,

    Charlai chhûng zawng âwllai nî awm lo rêng a’n.
4. Chhumpui a zîng, mal ruah a awn siau tláng sáng a’n,

    Fur khaw hnawm a lo in\an dáwn meuh chuan; 

    Khua tin a hnâwng, tuallai lên kan nuam lo,

    Sawmfáng lama’n \uan zai rél theih chang si lo;

    Vala léngi rûnah nilên awl asin,

    Tleidang rûna \uan leh zai reng rél lote’n.

5. Kipte’n han dáwn vêl ila, Zoram hun inher,

    A mak ngei Siamtu remruat dàn rêng hi;

    Hringmi, sa tin, va tin tán a hlu ber,

    Zoram hun inher han dáwn vel teh mah i;

    Siamtu lung fing duan dàn a lungawi thlâk ber,

    Mahse, \hena’n suihlunglêntu a chang si.

______________________________________________________________________________

He hla hi ni 21.01.1998-a kan khua (Zawngin)-a ka phuah a ni. Rhyme scheme ababab .

DáWN CHIANG TEH

Musep Lemchan / Skit : One Act Play


DáWN CHIANG  TEH

Changtute
1. Pa
2. Fapa
3. Fapa \hianpa pahnih
4. Fapa \hiannu



Ziaktu
Ellis H.Pachuau
17062002 1100PMAV

(Thawh\anni zan a ni a, tlangval pakhat hi Kristian |halai Pawl Inkhâwma inkhâwm tûrin a insiam a; Bible leh Hla Bu a la a, dawhkanah a dah leh a)
Fapa : E taka, zanin inkhâwmah Faith Promise hlan tûr a nih tak kha maw le. Ip an lak khâwm laiin ka pe ve mang si lo va. Pawisa ka la nei em aw...(A Wallet a phawrh a, a en nauh nauh a) E... ka nei daih tawh lo ang a...Cheng...Sawmli leh pahnih chu ka nei ngei maia’h. Cigaratte lei nan a lo berah Cheng Sawmhnih a ngai ang a, inkhâwm banah nula ka rim duh awm si a, a hánga han kal ngawt lah chu a ni chiah si lo va... Kuhva hring fun khat Cheng Nga...ka \hiani khán chocolate a ngaina si a, Cheng Sawm leh panga vêl...E...Faith Promise tûr a daih tawh lo. Ka pa hi lo haw hlauh se la aw...
(Kawngkhar a ri a, a pa a lo lut a)

ZANTLAIA'N LENGI RUNAH

1. Tlang sel pawh dawn zo lo reng hian,

    Zantlai a’n Lengi runah mahte’n ka lawi;

    A sakhmel sensiar ka thlir ning thei lo asin!

    Zankhua lo rei mah se Lungrunpui,

    Sial ang hawn zai reng rel a har \hin,

    Hrual hrui ang min phuar lam ang let a har ngei.

2. Mahse maw lunglam ka lo vai

    Hun sul ang a liam zel si, zankhua a rei

    Nangnena sam ang \hen nan maw bawhar lung fing

   An lo pau, \hen nan kawl a lo eng,

   Tlai khua var mah ila nang nen hian

   Ka ning lo’ng e nang nena len dun nan chuan.

3. Lam ang ka let, lamtluang a thui,

   Zanmu chhin a har ngei i tel lo chuanin;

   Dawn a sei, i tel lo chuan zankhua a rei

   Varkhua nghakin Vala laikhum a’n

   Zan mu chhing loten ka zal reng mai

   Engtin ngai ve ang maw e zaleng zawngten.

_______________________________________________________________________

He hla hi ni 20.01.1998-a kan khua (Zawngin)-a ka phuah a ni. Rhyme scheme ababab.

TAWNMANG LUNGMAWL

1. Laikhum thlehte nem ka bel zantlaia’n,

    Ka tawnmang lungmawl a’n ka di Thanghniangi

    Ka lo tawng asin!

    Hai ang \hang i lunglam ka vai,

    Ka hawi ruai ruai tawnmang lungmawl mai a’n

    Ka phal lo, tawnmang a lo chang mai si.

2. Ka dawn, ka dawn kir a maw tawnmang,

    Auhkir ruai ka nuam e, theih chang si lo;

    Nghilhni a awm lo’ng,

    Nghilh thei reng hian ka mawi si lo;

    A i emaw suihlung tileng tur reng

    Hian maw ka tawn, kohkir theih chang si lo.

He hla hi ni 09.02.1998 Zing dar 8 : 00 A.M-a kan khua (Zawngin)-a ka phuah a ni. Rhyme scheme abab a ni.

Notes :

Zan muthilh laia mumang hlimawm tak mai : Mahni bialnute han hmuh meuh hi chuan a hlimawm thei em em a. Nimahsela, mumang na na na zawngin awmzia a nei si lo. Kan han \hangharh a, kan mumang chuan min kiansan nghal a, auhkir tum mah ila, a theih tawh si loh. A chang chuan han \hangharh thut hian a tak emaw tiin kan han hawi ruai ruai ma; mahse mumang na na na zawng belhchian dawl lo hlimthla mai a lo ni \hin si a. Mang a \hat deuh chuan mumang mai mai atan chuan kan phal lo \hin teh zawng a nih hi.

A ngaitein khumah kan let kan let a; a ngai ang chiah emaw, a chhunzawmna emaw man \hat lehte kan chak rum rum a; mahse a theih si loh. Theihnghilh theih hian kan hre lo va, kan ngaihtuah veng veng a, lung tilengtu a chang leh mai si \hin.

LAIKHUM

1. Zantlai a lo ni a

    Leng tin zalna laikhum

    Thlehtenem puan sin a

    Zankhaw tlaitluana zan mu chhinna

    Zing\ian bawhar pau chuan

    Sam ang \hen tir e

    Mileng laikhum bel zawngte

2. Awmlai vei leh suihlungleng te’n

    Bel zel ta’ng e tiin

    An zal e laikhum zawlah;

    Par ni an nhgak relthang dawn loten

3. Duatten thlehtenem puan,

    Mawi chuang zelin

    An rem dim e zing\ianah;

    Rial ang lo dai chhun ni-ah

    Awmhar suihlunglengin

    Ngaiin au ve tak ang maw e,

    Zantlaia bel zawng te.

He hla hi ni 03.10.1997-a Electric Veng-a in ka luah laia ka phuah a ni.

A RUN A DANG IN TE (Kawthalo Hla)

Free verse

1. Ami lengte pisa kaina run in,

    Tuk tin chhiarin an liam

    Thla lo tharin thawh hlawh an la,

    An tan malsawmna lo ni e.

2. Kei zawng pisa ka kaina ve lem hi,

    A run a dang : in tê;

    Mahte’n ka bel lairil a ná,

    Lam ang let chuan laitha a khur

3. A zur zutin vawi sawm pathum lek lek,

    Tuk khata’n ka lawi a;

    Arva ek tia lek lek a tla

    A hnung kharna a phuan berh berh

4. Dawi chi tin reng sakhming hriat ngai loh kha

    Flagyl, Tetracycline

    Furextion, Sulphaquinadine

    ORS, a mum uk ei pawhin

5. Dam ni reng awm si lo laitha a zam

    Zopa dawi ráwn zelin

    Lungthi, kawlthei zik phak chep chup

    Ka hril seng lo : ka kawl ruih mai

6. Ka sakhmel a chul, a ki riam mai maw

    Lung reng a awi zo lo

    Lamtluang ka zawh khur der derin,

    Chhingmit a vai khaw hmuh a thim.

7. Vallai tuar a’n zawng hril tam a mawi lo

    Ngai mah ila lanu

    Tawn ka zuam lo thinlai a zam

    Sepui ruah tuar iang ka inchan /

    Laikhum belh nin a har ngei mai

Ka kaw\halo denchhena fiamthu atana ni 10.05.1998 11:30- P.M.-a Aizawl Venglai-a kan in luaha ka thaikawi mai mai a ni.

DUHTHUSAM

Tu nge maw i lo nih a,

Tu nge i chûn leh zuate?

Khawiah nge i \uan \hin a,

Khawiah nge i lo awm le?

Min zawng ni la, ka lâwm ang,

Min duh ni la, ka hlim ang;

Nang hi em ni, ka zawn chu,

Nang hi i ni, ka duh chu.

Ka hlân nang che, biahthudi,

Ka nghâk nang e, tiamthudi;

Min hlân ve la, hmangaihna,

Min hrilh ve la, lunglâwmna.

Ka thlang tawh che, nuthai a’n,

Ka thlang ber che, rûnlum a’n;

Rem ve mai la, ka tán hian,

Rem ve ngei se, nang nên hian.

He hla hi ni 26.8.2007 zan dár 11 : 55 P.M.-a ka phuah a ni a; rhyme scheme hi abab a ni.

DI NGAIH LUNGLEN

Shakespearan Sonnet

Ka hawi vêl a, tláng tin, mual tin hrûtin,

Chhîngmit lênin ka zawng ruai che asin;

Tùrnipui her chhuak ang maw nang tawn nán,

Ka nghâkhlel êm e nang nên hlimtea lên dun.

Nghilhni ka nei lo i sakhmélmawi kha,

Lunglawm a kim thei lo, i tel lo chuan;

Thinlaia’n a châm reng i anka nêm kha,

Tawn leh ka nuam ngei i kimtláng mawi hluan.

Hûiva lênthiam ka tîr mai nang che aw,

Thlawkin léng la ka di lênna tlánga’n;

An rûn bêlin biahthu hlân nang che aw,

“I chhailaidi a vâi ruai e,” tiin.

Kan \uanna tláng chu lo dang rih mah se,

Tawn leh nghâkin ka tán vul reng ang che.

He hla hi ni 26.8.2007 zing lam dar 12 : 19 A.M.-a Shakespearan Sonnet zulzuia ka phuah a ni a; rhyme scheme hi abab,cdcd,efef, gg a ni.