Hméltha

 Hméltha

Khuangchawi thla favàng ni chhuak êng mawi tak lâwm a, naupang tleirãwl \antir êk êkho; nula la tih ngam chiah si loh, High school han kal pêl ve tawh nise nula han tih ngam ve mai tùrte thlìr paha chhîngmit hawnga han hawi vêl mai mai hi a nuam ve êm êm a. Mi tinin hlim hi kan châk a, a nuam pawh kan ti a; hlimna tih erawhchu sawifiah a har nangiang a ni ang- GK Chesterton(1874-1930) pawhin, “Hlimna hi sakhua ang bawka thilmak hriat phâk loh a ni a, sawifiah rual a ni lo kumkhua ang,” a lo ti hial a. Kan hlimna pawh a inang lo hle ang a-a \hen zai te, a \hen infiam te, hnathawh te, inkawm ho tein an hlim \hìn a; a \hen te erawh chu hmél\ha an tih tak mai an hmuh hian an hlim \hìn thung. An demawm chuang rêng rêng lo. Hlimna makzia an tilang chiang ting mai a ni. Mahni ngaihzawng duh berte nêna khawhar ina lênkhâwmna kal ho \hinte pawh hian \henkhat an hlim \hìn a, chu chu mi lungngaihna azâra a \hente hlimna a ni \hìn. Hmél\ha kan tih êm êmten kan beisei leh kan rin phâk bâka min lo lawm thiam a, min lo biak \hatte hian a \hente chu kan hlimin kan lãwm êm êm bawk a.

  Hmél\hate kianga awm avànga hlimna chu a demawm hran lo, hmél\ha te tluka hmuhnawm leh lawmawm hi an awm chuang lo. Film Star Brooke Shield te, Marilyn Manroe te, Madhuri Dixit te, Raveena Tandon te leh Model hmingthang Cindy Crawford te, Kate Mose etc te leh Miss Universe, Miss World an thlan leh an chevêl han hmuh ringawt pawh hi a nuam a, a hlimthlâk rêng a ni. Hmél\ha hi chu an hlu a, an ropui a, an zahawm a, hmuh an nuam a, mi an tihlim \hìn ngawt mai. Nimahsela, hmél\hate hi malsâwmna chi khat an ni tak na a, malsâwmna dangte aiin a chungnung bîk chuang lo.

A VARA TUAM

A VARA TUAM

April 2005 thla chawhma lam a ni a, Bial K.|.P Chanchin bu buaipuia Computer hmaa ka \hut mêk laiin, Thingtláng lama kan chhûngten min rawn bia a, “ I nau a chau hle a, zanin pawh kan daih tawhin kan inring lo,” an rawn ti thut mai a!

    Chu thu avàng chuan thâwklehkhatah ka bîng ta nghal mup mai a. Engtin nge ni ta ang le?A rang thei ang bera kal nghal chu a ni ringawt mai. A ni tak a, khaw hmawr a\anga khaw tâwp, khaw mawng a\anga khaw lû, in tin beng sika han ngaihtuahin, damdawi lam thiam an awm ka hre si lo. A thiam ber pawh naupiang pangngai chhar thei \awn tawn, tih nawn leh huphurh awm khawpa thisen la thei hrãm hrâm, kut dam lêm lo tak chu damdawi lam thiam awmchhun chu a ni. Chumi ngawt chuan inthlamuan harsa tak a ni.

    Chuan, kan han kal ta a, kal kawng a thui duh ngei mai. Inbiakpawhna dang a awm tawh si lo va, ‘Min lo la nghâk hrãm ang chu maw, a ruang tal chu kan la nang hman êm ang chu’ ti chungin kan kal zêl a, khaw chhûng luh dáwnah, khuang ri awm leh awm loh thlengin ngaihtuah loh theih pawh a ni lo.

    Kan khua chu kan han thleng a, a hnuk êm zawng a lo la chat lo va. Kan thlen ve tâk avànga dam beiseina chu a san phah chuang lo, a chhan chu damdawi han chawh a, han pe tùr chuang kan awm lo. Aizawl a\anga rin thua damdawi han ken ringawt lah chu tih chi a ni bawk si lo. Kan ken ngam chhun pawh nachhâwkna, Paracetamol aia sâng ve deuh a ni.

CFL Hmingthanga Nghilh Loh Nan (|henlohna ram nuama intawng leh turin, Thlafam vangkhuaah min lawi san ta)

CFL Hmingthanga Nghilh Loh Nan

(|henlohna ram nuama intawng leh turin, Thlafam vangkhuaah min lawi san ta)

-Ellis H.Pachuau

Kum 1992 a ni a, kan khua atanga km 9 leka hnai Suangpuilawn H/S-ah Pawl 10 ka zir lai a ni a. Keini lah inti tlangval ve \an, a lang a pauva chhungte hriatpuia ngaihzawng la nei ngam lo, ngaihzawng erawh nei ve tawh si kha kan ni a,  kan lehkha zir chawlh lai hian zan dar 9:30-a Lunglen hun kha All India Radio-ah kan herh chhuak a, chutih lai chuan-
FM :Chun leh zua run in chhungah biahthu hrilh a rem si lo
Zantiang Chhawrthla eng hnuaiah duhten aw ka lo nghak che

 M: Aw ka di nang ngaih vang hian i liamna lamtluang chhuiin
Hmangaih ber ka tawng ta che chhawrhthlapui eng hnuaiah

Aw ka di i tel lo chuan e
Chhunni leh zan khua ka hmang liam thei si lo
Kan chhuahtlang hmun hlui lamtluang ngeiah hian e
|hen loh biahthudi hril dun leh ang aw.

THUZIAK HMANGA RAWNGBAWLNA

THUZIAK HMANGA RAWNGBAWLNA

-Ellis H.Pachuau

“Khawl ha 26 min pe ula, khawvel hi ka hneh vek thei ang”

-Benjamin Franklin

 Thuziak hmanga rawngbawl chu eng nge?

Thuziak han tih hian khawii hmunah pawh eng hmunah pawh thu awmze neia chhiar theiha ziak hi a ni ber mai a. Thuziak hmanga rawngbawl kan tih chuan thuziak hmanga mi nun tidanglam emaw, tinghet emaw behchhan nei thei tura thuziak dah emaw hi a tih theih ang.

Thuziak pawimawhna

|awngkama kan sawi hi chu a hun laiin hre chiang viau mah ila, hun a lo kal deuh a, a nihna ang diak diakin kan hre vek thei tawh si lo va : phuah belh leh paih \hente a lo awm phah a, kan thu a saisa nuaih \hin a ni. |henkhatin, “Chutiang chuan a sawi ngei kha maw le,” tiin awihawm takin an sawi a, mi \henkhatin, “Chutiangin a sawi lo reng reng, chuti zawk chuan alawm a sawi,” an lo ti ve bawk a. Ziaka thu dah a awm loh avangin mi \henkhat inkarah inhnialna a chhuak thei hial a ni! Thuziak behchhan tur, \anchhan tur \ha a awm miau loh chuan mi sawi loh pui kan sawitir a, mi sawi reng pawh kan hmaih thung \hin a ni. Kan hriat chhuah zawh tawh loh phei chuan mi thusawi \ha tak tak te, ropui tak takte hi a thamral mai \hin a ni. Thuziak a awm erawh chuan tu thusawi pawh han phuah belh tur a awm lo va, paih \hen tur pawh a awm hek lo. Thu dik leh dik lo a tar lang a, inhnialna a lo awm pawhin chu thuziak chuan a remfel \hin a ni. Thuziak a awm tawh chuan rin thu a leng lo va, dawt pawh a sawi ngai hek lo va, ngawi rengin thuhretu rinawm tak a ni \hin zawk a ni.